मास्टर ऑफ क्रिकेट… अर्थात क्रिकेटमधील सर्वात खतरनाक क्रिकेटपटूंची जेव्हा चर्चा होते, तेव्हा विरेंद्र सेहवागचे आवर्जुन नाव घेतले जाते. भारताचा माजी सलामीवीर फलंदाज सेहवाग हा असा फलंदाज होता, ज्याच्यापुढे विरुद्ध संघातील कर्णधारांच्या सर्व योजना फिक्या पडायच्या. सेहवागने आपल्या फलंदाजीच्या जोरावर अनेक गोलंदाजांच्या तोंडचे पाणी पळवले आहे. तो मैदानावर उतरल्यानंतर पहिल्या चेंडूपासूनच गोलंदाजांची धुलाई करण्यास सुरुवात करायचा.
आंतरराष्ट्रीय क्रिकेटच्या तिन्ही प्रकारात विस्फोटक फलंदाजी करणाऱ्या सेहवागने क्रिकेटविश्वात आपली एक वेगळी ओळख निर्माण केली आहे. त्याची वनडे, टी२० आणि कसोटी या तिन्ही क्रिकेटप्रकारातील कामगिरी उल्लेखनीय आहे. कसोटीत त्याने १०४ सामन्यात ६ द्विशतकांच्या आणि २३ शतकांच्या मदतीने ८५८६ धावा केल्या आहेत. तर, वनडेत २५१ सामन्यात एका द्विशतकाच्या आणि १५ शतकांच्या मदतीने ८२७३ धावा केल्या आहेत. तसेच, १९ टी२० सामन्यांमध्ये २ अर्धशतके मारत त्याने ३९४ धावा केल्या आहेत.
या लेखात, सेहवागच्या क्रिकेट कारकिर्दीशी जुळलेल्या १० गोष्टींचा आढावा घेण्यात आला आहे, ज्या क्वचितच तुम्हाला माहित असतील. 10 Unknown Facts About Virender Sehwag Career
केवळ ७ महिन्यांच्या वयात दिसून आली क्रिकेटशी जवळीक –
सेहवागच्या आई-वडीलांनी कधीही विचार केला नव्हता की, त्यांना मुलगा झाल्यास ते त्याला भविष्यात क्रिकेटपटू बनवतील. सेहवागचे वडील किशन सेहवाग यांनी सर्वसाधारण पालकांप्रमाणे लहानपणी आपल्या मुलाला प्लास्टिकची बॅट विकत आणली होती. तेव्हा केवळ ७ महिन्यांचा असणाऱ्या सेहवागने त्या बॅटसोबत खेळण्यास सुरुवात केली आणि पुढे तो जसजसा मोठा झाला. तसतसे त्याचे क्रिकेटप्रती प्रेम वाढले.
लहानपणी वडिलांनी लावली होती क्रिकेट खेळण्यावर बंदी –
केवळ ७ महिन्यांचा असल्यापासून क्रिकेट सेहवागचा सर्वाधिक लोकप्रिय खेळ बनला होता. परंतु, त्याच्या वडीलांनी तो १२ वर्षांचा असताना क्रिकेट खेळण्यावर बंदी घातली होती. कारण, क्रिकेट खेळताना सेहवागचा दात तुटला होता. पण, सेहवाग त्याच्या आईजवळ क्रिकेट खेळण्यासाठी हट्ट करुन बसला. परिणामत: त्याच्या आईने त्याच्या वडीलांना मनवले आणि सेहवागने पुन्हा क्रिकेट खेळण्यास सुरुवात केली.
सेहवागच्या कारकिर्दीतील पहिला विवाद –
तसं तर, सेहवागने १९९९ साली भारतीय संघात पदार्पण केले होते. परंतु, २००१मध्ये त्याला भारतीय कसोटी संघात प्रवेश मिळाला होता. एलिजाबेथ येथे दक्षिण आफ्रिकाविरुद्धच्या पहिल्या कसोटी सामन्यातून त्याने कसोटीत पदार्पण केले होते. यावेळी पहिल्या सामन्यातच त्याने दमदार शतक मारले होते. परंतु, मालिकेतील दूसऱ्या सामन्यात जास्त अपील केल्यामुळे सामना रेफरीने ६ भारतीय खेळाडूंवर बंदी घातली होती. यामध्ये सेहवागचाही समावेश होता. बीसीसीआयने नंतर विरोध केल्यामुळे बंदी हटवण्यात आली होती.
म्हटले जात होते सचिनचा क्लोन –
सेहवागच्या फलंदाजी शैली, उभा राहण्याची पद्धती आणि शॉट्स मारण्याच्या अंदाजामुळे त्याच्यामध्ये मास्टर ब्लास्टर सचिन तेंडूलकरची छबी असल्याचे म्हटले जात होते. सेहवागला दूरुन पाहिल्यानंतर तो मैदानावर आहे का सचिन, हे ओळखणे अवघड जात असायचे. कारण, सेहवाग बऱ्याच प्रमाणात सचिनसारखा दिसतो. त्यामुळे सेहवागला सचिनचा क्लोन म्हटले जात होते.
असा बनला मुल्तानचा सुल्तान –
सेहवाग नजफगडचा असल्यामुळे त्याला नजफगडचा नवाब म्हटले जात होते. परंतु, २००४मध्ये त्याने पाकिस्तानविरुद्ध केलेल्या पराक्रमामुळे त्याला मुल्तानचा सुल्तान हे नवे नाव देण्यात आले. त्याने मुल्तान येथे पाकिस्तानविरुद्ध कसोटीत ३०९ धावांची अफलातून खेळी केली होती. त्यामुळे त्याला हे नाव देण्यात आले.
जबरदस्त पुनरागमन –
१९९९ साली पाकिस्तानविरुद्धच्या सामन्यातून सेहवागने वनडेत पदार्पण केले होते. पुढे आपल्या जबरदस्त फलंदाजी प्रदर्शनाने त्याने २००१मध्ये संघातील आपले स्थान कायम केले. मात्र, २००६ साली खराब प्रदर्शनामुळे सेहवागला संघातून बाहेर करण्यात आले. पुढे १ वर्षाच्या प्रतिक्षेनंतर त्याने जबरदस्त पुनरागमन केले आणि एकापेक्षा एक विक्रमांची नोंद केली.
२०१० साली बनला कसोटी क्रिकेटमधील १ नंबरचा फलंदाज –
वेळेनुसार कसोटी क्रिकेटमध्ये सेहवागने आपली ओळख निर्माण करण्यास सुरुवात केली. आपल्याला कसोटी क्रिकेटमध्ये लायक न समजणाऱ्यांची त्याने बोलती बंद केली. २००८ ते २०१० हा सेहवागच्या कसोटी कारकिर्दीतील सुवर्णकाळ होता. या दोन वर्षांमध्ये सेहवाग कसोटी क्रिकेटमधील अव्वल क्रमांकाचा फलंदाज बनला होता.
फलंदाजी करताना गुनगुनने –
मैदानावर उतरल्यानंतर एका खेळाडूचे पूर्ण लक्ष हे चांगल्या प्रदर्शनावर असते. चांगले प्रदर्शन करण्याच्या दबावामुळे खेळाडू गंभीर दिसतात. परंतु सेहवागच्या बाबतीत असे नव्हते. तो फलंदाजी करत असताना कोणत्याही परिस्थीतीत दबाव घेत नसायचा. तो नेहमी कोणते ना कोणते गाणे गुनगुनत असायचा. याविषयी बोलताना सेहवाग म्हणाला होता की, “जेव्हाही मी नॉन स्ट्राईकर बाजूला उभा असतो, तेव्हा माझ्या मनातील सर्व नकारात्मक विचांराना दूर करतो. त्यासाठी मी गाणे किंवा भजन गुनगुनतो.”
‘बाप बाप होता है और बेटा बेटा’ हे विधान –
सेहवागची बॅट जेवढी चालत असायची, तेवढीच त्याची जीभही चालायची. असेच एकदा, पाकिस्तानविरुद्धच्या एका सामन्यात त्याने शोएब अख्तरच्या चेंडूवर जोरदार षटकार मारला होता. त्यानंतर शोएबजवळ जाऊन सेहवागने ‘बाप बाप होता और बेटा बेटा’ हे विधान केले होते. तेव्हापासून हे विधान प्रसिद्ध झाले.
वनडेतील द्विशकानंतर काही सामने खेळून संपली कारकिर्द –
जेव्हाही सेहवागच्या निवृत्तीची आठवण काढली जाते, तेव्हा चाहत्यांना खूप दुख: होते. कारण, सेहवागला त्याचा शेवटचा वनडे सामना खेळण्याची संधी मिळाली नाही. त्याने डिसेंबर २०११ला वनडे क्रिकेटमध्ये द्विशतक ठोकले होते. तेव्हा सर्वांना वाटले की, सेहवाग अजून खूप दिवस क्रिकेट खेळेल. परंतु, त्या सामन्यानंतर १० वनडे सामन्यांतच त्याला संघातून बाहेर करण्यात आले. त्यानंतर त्याला पुनरागमनाची संधी मिळाली नाही. अखेर २०१५ला त्याने आंतरराष्ट्रीय क्रिकेटमधून निवृत्ती घेतली.
ट्रेंडिंग लेख –
पहिल्या आठवड्यात विदेशी खेळाडू नसल्यास या संघांना होणार सर्वाधिक नुकसान
हे ५ खेळाडू जिंकू शकतात आयपीएल २०२० ‘मोस्ट व्हॅल्यूएबल प्लेयर’ चा पुरस्कार
आयपीएल २०२०: सर्व ८ संघांच्या खेळाडूंची संपूर्ण यादी
महत्त्वाच्या बातम्या –
क्रिकेटवेड्या देशाला फुटबॉलची भुरळ पाडणारा सुनील छेत्री
‘धोनीपेक्षा श्रेष्ठ कोणीही नाही’ इंग्लंडच्या खेळाडूने केली धोनीची प्रशंसा…
अनेक दिग्गजांनाही न जमलेला असा खास पराक्रम करणारा वीरेंद्र सेहवाग एकमेव भारतीय क्रिकेटपटू