भारत आणि ऑस्ट्रेलिया यांच्यात १७ डिसेंबर पासून ४ कसोटी सामन्यांची मालिका सुरू होणार आहे. या मालिकेतील पहिला सामना गुलाबी चेंडूने दिवस-रात्र प्रकारात खेळला जाणार आहे. गुलाबी चेंडूने होणाऱ्या सामन्यांत फलंदाजांना धावा बनवणे अवघड जाते. अशा परिस्थितीत सलामी जोडीचे महत्त्व आणखीनच वाढते. मात्र, पहिल्या कसोटी सामन्यासाठी भारतीय संघाकडून कोणते खेळाडू सलामीला येतील, हे अजूनही स्पष्ट झालेले नाही. कर्णधार विराट कोहलीसमोर सलमीसाठी मयंक अगरवाल, पृथ्वी शॉ, शुबमन गिल, केएल राहुल व हनुमा विहारी हे ५ पर्याय उपलब्ध आहेत. हे पाहणे उत्सुकतेचे ठरेल की भारतीय संघ व्यवस्थापन कोणत्या खेळाडूंना संधी देते.
मयंक अगरवालचे खेळणे निश्चित
क्रिकेट पंडितांकडून हे म्हटले जात आहे, की मयंक अगरवाल हा भारताचा पहिला सलामीवीर असेल. मयंक वनडे आणि टी२० सामन्यातही उपस्थित होता. त्याने पहिल्या दोन वनडे सामन्यात चांगली सुरुवात करून दिली होती. तरीही, तो आपला खेळ पुढे घेऊन जाऊ शकला नाही. दुसऱ्या सराव सामन्यात त्याने अर्धशतक ठोकले होते. याव्यतिरिक्त त्याने आपल्या पदार्पनापासूनच भारतीय संघासाठी उत्तम कामगिरी केलेली आहे. त्यामुळे त्याची जागा निश्चित मानली जात आहे.
पृथ्वी शॉ आक्रमक
मयंकसोबत दुसरा सलामीवीर म्हणून पृथ्वी शॉ याला संधी मिळण्याची शक्यता जास्त आहे. पृथ्वीने सलामीला मिळालेल्या मोजक्या संधीचा फायदा घेत उत्तम कामगिरी केलेली आहे. मात्र, पृथ्वीबद्दल अलीकडील काळात एक बाब निदर्शनास आली आहे की तो अती आक्रमक आहे. सुरुवातीला चेंडू हवेत हालचाल करत असून देखील पृथ्वी आक्रमक फटके मारण्याचा प्रयत्न करतो व त्यामुळे अनेक वेळा तो लवकर बाद होतो. अशा परिस्थितीत पृथ्वीला सलामीला संधी मिळते की नाही, हे पाहणे उत्सुकतेचे ठरेल.
दुसऱ्या सलामीवीरासाठी ३ दावेदार
दुसऱ्या सलामीवीरासाठी तब्बल ३ दावेदार आहेत. त्यामध्ये शुबमन गिल, केएल राहुल आणि हनुमा विहारी यांचा समावेश आहे. शुबमन गिलने गुलाबी चेंडूने झालेल्या दुसऱ्या सराव सामन्यात उत्तम फलंदाजी करत संघ व्यवस्थापनाचे लक्ष आपल्याकडे वेधले आहे. गिलने या सामन्यातील पहिल्या डावात ४३, तर दुसऱ्या डावात ६३ धावांची खेळी केली आहे. गिलच्या या कामगिरीमुळे अनेक क्रिकेट पंडित त्याला सलामीला संधी मिळावी अशी मागणी करत आहेत.
केएल राहुल आणि हनुमा विहारीचा दावा कमकुवत
केएल राहुल व हनुमा विहारी यांचा सलामीसाठीचा दावा थोडा कमकुवत जाणवतो. राहुल मागील एका वर्षापासून संघाबाहेर आहे, तर विहारीने प्रामुख्याने मधल्या फळीत फलंदाजी केलेली आहे. विहारी पहिल्या सामन्यात मधल्या फळीत फलंदाजी करेल, असे जवळ जवळ स्पष्ट आहे. त्यामुळे या दोन खेळाडूंना सलामीला संधी मिळणे फारच कठीण जाणवत आहे.
महत्त्वाच्या बातम्या-
लंका प्रीमियर लीगमधील अंतिम सामन्याची संपूर्ण माहिती, जाणून घ्या एका क्लिकवर
नववर्षात वेस्ट इंडिज करणार बांगलादेशचा दौरा, ‘या’ कारणामुळे टी२० मालिका रद्द
“बुमराह एकटाच मालिकेत फरक निर्माण करू शकतो”, ऑस्ट्रेलियन दिग्गजाने केली स्तुती