जेव्हापासून क्रिकेट सुरु झाले, तेव्हापासून आतापर्यंत दरवर्षी असे काही खेळाडू येत आहेत, जे आपल्या देशांतर्गत सामन्यांमध्ये धडाकेबाज खेळी करत, सातत्याने मेहनत घेत राष्ट्रीय संघात स्थान मिळवत आहेत. खेळ असो किंवा खरे आयुष्य असे म्हटले जाते, की त्यामध्ये ‘लक’ ची जरा जास्तच आवश्यकता असते. अनेकवेळा या ‘लक’ ची आवश्यकता ही संघातून बाहेर असणाऱ्या खेळाडूला जास्त असते.
याचे उदाहरण आपल्या समोर आहेच ते असं, की २०१०मध्ये रोहित शर्माचे कसोटी क्रिकेटमध्ये पदार्पण होणार होते, परंतु तो नाणेफेकीच्या १५ मिनिटांपूर्वी दुखापतग्रस्त झाला. त्यामुळे त्याच्या जागी वृद्धिमान साहाला पदार्पणाची संधी मिळाली. याव्यतिरिक्त २०१९च्या विश्वचषकात रिषभ पंत भारतीय संघाचा भाग नव्हता, परंतु शिखर धवन दुखापतग्रस्त झाल्यामुळे पंत संघात सामील झाला आणि त्याला विश्वचषकात खेळण्याची संधीही मिळाली, तर हे असतं ‘लक’.
अशाच काही ३ घटना आपण या लेखात पाहणार आहोत, ज्यामध्ये खेळाडू दुखापतग्रस्त झाल्यामुळे दुसऱ्या खेळाडूला त्याचा फायदा झाला आहे.
दुसर्या खेळाडूसाठी लकी ब्रेक ठरलेल्या क्रिकेटपटूंच्या दुखापती- Injuries to Cricketers that Turned Out to be Lucky Break for another Player
३. ख्रिस गेलला मिळाली डर्क नॅनेसची जागा
ते वर्ष होतं २०११ आणि आयपीएलचा मोसम होता चौथा. त्यादरम्यानच्या आयपीएल लिलावात विस्फोटक फलंदाज ख्रिस गेलला (Chris Gayle) कोणत्याही संघाने आपल्या संघात सामील केले नव्हते. त्याचे कारण असे होते, की तो संपूर्ण स्पर्धेत संघांसाठी उपलब्ध नव्हता. तरीही रॉयल चॅलेंजर्स बेंगलोरमध्ये सामील असणारा वेगवान गोलंदाज डर्क नॅनेस (Dirk Nannes) दुखापतग्रस्त झाला होता, त्यामुळे आरसीबीने गेलला आपल्या ताफ्यात सामील केले होते.
गेलने २०११ च्या आयपीएलमध्ये चमकदार कामगिरी करत आपल्या फलंदाजीने तब्बल ६०० पेक्षा अधिक धावा केल्या. गेल तब्बल पुढील ६ वर्षे म्हणजेच २०१७ पर्यंत आरसीबी संघाचा भाग होता. त्यादरम्यान त्याने ४ शतके ठोकली होती. याचदरम्यान त्याने २०१३ मध्ये पुणे वॉरिअर्सविरुद्ध खेळताना आयपीएल इतिहासातील नाबाद १७५ धावांची खेळी केली होती. हा आयपीएलमधील सर्वाधिक धावांचा विक्रम आतापर्यंत कोणीही मोडू शकले नाही.
२. संजय मांजरेकरांच्या जागी राहुल द्रविडची वर्णी
भारतीय संघाचे माजी खेळाडू संजय मांजरेकर (Sanjay Manjrekar) हे एक चांगले फलंदाज होते. त्यांनी भारताकडून ३७ कसोटी सामने खेळताना ३७.१४ च्या सरासरीने २००० पेक्षाही अधिक धावा केल्या होत्या. १९९६ साली इंग्लंडविरुद्धच्या दुसऱ्या कसोटीपूर्वी ते दुखापतग्रस्त झाले होते, त्यामुळे त्यांच्या जागी कर्नाटकचा युवा फलंदाज आज आपण त्याला ‘द वॉल’ म्हणून ओळखतो, तो खेळाडू म्हणजेच राहुल द्रविडला (Rahul Dravid) संघात जागा मिळाली होती.
द्रविडने क्रिकेटची पंढरी समजल्या जाणाऱ्या लॉर्ड्समधून आपल्या क्रिकेट कारकिर्दीची सुरुवात केली होती. त्याने पदार्पणाच्या कसोटी सामन्यात ९५ धावांची खेळी केली होती. पुढे त्याने संघासाठी अनेक अविस्मरणीय खेळी केल्या. त्याने आंतरराष्ट्रीय कारकीर्द २०१२ मध्ये निवृत्ती घेतली. तरीही मांजरेकरांनी त्यादरम्यान दुखापतीतून बरे होत पुढे काही सामने खेळले आणि १९९६ सालीच निवृत्ती घेतली.
१. मायकल हसीने घेतली जस्टीन लँगर यांची जागा
ऑस्ट्रेलियाचा दिग्गज फलंदाज मायकल हसीने (Michael Hussey) आपल्या प्रथम श्रेणी पदार्पण १९९४- ९५ दरम्यान केले होते. त्यावेळी तो वेस्टर्न ऑस्ट्रेलिया संघाकडून सातत्याने चमकदार कामगिरी करत होता. परंतु त्याला ऑस्ट्रेलियाच्या कसोटी संघात स्थान मिळविण्यासाठी तब्बल १० वर्षांचा कालावधी म्हणजेच २००५ उजाडावे लागले. धडाकेबाज सलामीवीर फलंदाज जस्टीन लँगर (Justin Langer) यांना दुखापत झाल्यामुळे वेस्ट इंडिजविरुद्धच्या पहिल्या सामन्यातून बाहेर पडावे लागले होते. २००१ नंतर ही पहिली संधी होती, जेव्हा ऑस्ट्रेलियाने आपली सलामी जोडी बदलली होती.
हसीने विंडीजविरुद्धच्या पहिल्या कसोटी सामन्यातील पहिल्या डावात १ आणि दुसऱ्या डावात २९ धावा केल्या होत्या. परंतु त्यानंतर होबार्ट येथे त्याने पहिल्या डावात तब्बल १३७ धावांची तुफान खेळी केली आपली निवड सार्थ असल्याचे दाखवून दिले. त्यानंतर अनेक वर्षापर्यंत तो संघाचा जीव की प्राण बनला होता. त्याला ‘मिस्टर क्रिकेट’ या नावानेही ओळखले जाते.
ऑस्ट्रेलियाकडून खेळताना त्याने ५१.५२ च्या सरासरीने आणि १९ शतकांच्या मदतीने ६२३५ धावा ठोकल्या.