अपंग भारतीय क्रिकेटर्सचे होतायत हाल, सौरव गांगुलीकडून आहे मदतीची अपेक्षा

अनेकांना असे वाटते की, जर एकदा भारताकडून क्रिकेट खेळायची संधी मिळाली. तर, त्या क्रिकेटपटूचे पूर्ण आयुष्य बदलते. पण, भारतीय संघाची जर्सी घालणारा प्रत्येक क्रिकेटपटू नशीबवान नसतो. विशेषत अपंग क्रिकेटपटू, ज्यांना अपेक्षा आहे की भारतीय क्रिकेट बोर्ड त्यांना आसरा देईल. Wheel Chair Cricketers Need BCCI Chief Sourav Ganguly Help

भारताचे यष्टीरक्षक फलंदाज निर्मल लिंग ढिल्लो हे पंजाबच्या मोगा येथे दूध विकून दिवस काढत आहेत. तर, संतोष रंजागणे हे कोल्हापूरमध्ये दुचाकी वाहनांची दुरुस्ती करतात. तसेच, फलंदाज पोशन ध्रुव हे रायपुरमधील एका गावात वेल्डिंग दुकानात काम करतात. परंतु, या क्रिकेटपटूंना कोरोना व्हायरसमुळे करण्यात आलेल्या लॉकडाऊननंतर शेतात दिवस-रात्र मजदूरी करुन आपले पोट भरावे लागत आहे. तिथे त्यांना दिवसाला फक्त १५० रुपये मिळतात. या तिन्ही क्रिकेटपटूंनी नुकत्याच राष्ट्रीय संघाच्या यशात महत्त्वाची भूमिका निभावली आहे. पण, दिव्यांग क्रिकेटपटूंची जबाबदारी बीसीसीआयवर नसल्यामुळे त्यांचे हाल होत आहेत.

लोढा समितीच्या शिफारशींनुसार बोर्डाने शारीरिकरित्या अपंग असणाऱ्या क्रिकेटपटूंच्या विकासासाठी एक समिती निर्माण करायला पाहिजे, पण अद्यापही त्याचे काम झालेले नाही. भारताच्या व्हिलचेअर संघाचे कर्णधार सोमजीत सिंग यांनी पीटीआयशी बोलताना सांगितले की, “बीसीसीआयचा अध्यक्ष सौरव गांगुलीने भारतीय व्हिलचेअर क्रिकेट संघाच्या सीईओशी यासंदर्भात बोलणी केली होती. पण, अपंग क्रिकेपटूंसाठी धोरण आखण्यासंदर्भात आता कसलीही चर्चा होताना दिसत नाही. गांगुलीने आम्हाला मदत करण्याचे वचन दिले होते. त्याला भारतीय व्हिलचेअर क्रिकेटविषयी जास्त माहिती नव्हती. पण, आमच्या प्रदर्शनाविषयी ऐकून तो दंग झाला होता.”

सोमजीतने सुरुवातीला उत्तर प्रदेश व्हिलचेअर क्रिकेट संघ आणि नंतर स्क्वाड्रन लीडर अभय प्रताप सिंग यांच्यासोबत मिळून राष्ट्रीय संघ बनवण्यात महत्त्वाची भूमिका बजावली होती. सोमजीत हे हवाईदलाचे माजी फायटर पायलट होते. अपंग क्रिकेटपटूंचे म्हणणे आहे की, बीसीसीआयने ज्याप्रकारे महिला क्रिकेटचा विकास केला आहे. त्याप्रकारे त्यांनी आम्हालाही मदत करायला हवी. बीसीसीआयकडून मान्यता न मिळाल्यामुळे राज्य स्तरावर अनेक संघ निर्माण झाले आहेत. त्यामुळे व्हिलचेअर क्रिकेटपटूंना खेळात टिकून राहण्यासाठी स्वत: खर्च करावा लागत आहे.

संतोष रंजागणे म्हणाले की, “आम्हाला नेपाळ दौऱ्यावर जाण्यासाठी १५ हजार रुपये द्यावे लागले होते. त्यामुळे मला खुप वाईट वाटले होते. पण, नंतर मी राष्ट्रीय संघाशी जुळलो आणि तेव्हापासून ते आमची काळजी घेत आहेत. राष्ट्रीय संघातील अपंग क्रिकेटपटूंना राज्य सरकारकडून एक हजार रुपये पगार मिळतो.”