टी-२० क्रिकेट प्रकारातील सर्वांच्या पसंतीची स्पर्धा म्हणजे इंडियन प्रीमियर लीग. आयपीएलच्या १३ व्या हंगामासाठी चाहत्यांना खूप प्रतीक्षा करावी लागली. कारण कोरोना विषाणूमुळे ही स्पर्धा नियोजित वेळी होऊ शकली नाही. पण अखेर आयपीएलचा हा हंगाम १९ सप्टेंबरपासून युएईमध्ये सुरू होणार आहे.
आयपीएलच्या या हंगामासाठी सर्व संघ पूर्णपणे सज्ज आहेत. हा हंगाम युएईमध्ये असल्याने तेथील खेळपट्ट्या अतिशय संथ आणि फिरकी गोलंदाजांना उपयुक्त अशा आहेत. त्यामुळे क्रिकेटमधील सर्वात मोठ्या टी-२० क्रिकेट स्पर्धेचा हा हंगाम फिरकी गोलंदाज गाजवण्याची शक्यता जास्त आहे. सर्व संघांकडे उत्तम फिरकी गोलंदाज आहेत, परंतु या लेखात त्या ३ संघांबद्दल जाणून घेऊ ज्यांच्याकडे सर्वाेत्तम फिरकी गोलंदाज आहेत.
या ३ संघांकडे फिरकी गोलंदाजीची मोठी फळी
चेन्नई सुपर किंग (Chennai Super Kings)
आयपीएलच्या इतिहासात चेन्नई सुपर किंग्जने सर्वाधिक सातत्यपूर्ण कामगिरी केली आहे. चेन्नई सुपर किंग्ज संघ प्रत्येक हंगामात विजयाचा मोठा दावेदार असतो. या वेळीसुद्धा धोनी ब्रिगेड मजबूत दावेदार आहे. या संघात फलंदाज गोलंदाजाचा उत्तम संयोजन आहे. या सर्वांमध्ये सीएसकेमधील फिरकी गोलंदाजी ही सर्वात मोठी गोष्ट आहे.
सीएसके संघात इम्रान ताहिर, रवींद्र जडेजा, मिचेल सँटनर, पियुष चावला आणि कर्ण शर्मासारखे उत्कृष्ट फिरकी गोलंदाज आहेत. तसेच युवा फिरकी गोलंदाज सई किशोर देखील आहे. याशिवाय संघात केदार जाधवही महत्वाची भूमिका निभावू शकतो. एकूणच फिरकीच्या बाबतीत चेन्नईचा संघ जबरदस्त आहे.
सनरायझर्स हैदराबाद (Sunrisers Hyderabad)
आयपीएल मधील सनरायझर्स हैदराबाद हा एक उत्तम संघ आहे. सनरायझर्सकडे फलंदाजीत आणि गोलंदाजीत चांगले पर्यायी खेळाडू आहेत. सनरायझर्स हैदराबाद संघाला आतापर्यंत फक्त एकदाच आयपीएलचे विजेतेपद जिंकता आले आहे.
सनरायझर्स संघामध्ये उत्तम फलंदाज तर आहेतच तसेच फिरकी गोलंदाजी सुद्धा जबरदस्त आहे. त्यांच्याकडे राशिद खान सारखा अनुभवी गोलंदाज आहे. याशिवाय मोहम्मद नबी, शाहबाज नदीम, अभिषेक शर्मा आणि फॅबियन ऍलन सारखे फिरकी गोलंदाज आहेत. त्याचबरोबर पर्यायी म्हणून संजय यादव, अब्दुल समद आणि विराट सिंगही आहेत.
दिल्ली कॅपिटल (Delhi Capital)
आयपीएलमध्ये दिल्ली कॅपिटल संघाला अद्याप एकदाही विजेतेपद जिंकता आलेले नाही. गेल्या हंगामात दिल्ली कॅपिटल संघाने शानदार प्रदर्शन केले होते. यंदाही त्यांचा संघ एक बलाढ्य संघ म्हणून स्वत: ला सिद्ध करण्यास सज्ज असेल. यावेळी दिल्ली संघातही काही अनुभवी खेळाडूंचा सहभाग आहे.
या संघाच्या फिरकी गोलंदाजीत अमित मिश्रा, आर अश्विन आणि अक्षर पटेल असे उत्तम फिरकीपटू आहेत. त्याचबरोबरच संदीप लामिछाने आणि ललित यादव देखील आहेत.