डेहराडून: 38 व्या राष्ट्रीय क्रीडा स्पर्धेत महाराष्ट्राच्या जोडीला रुपेरी यशावर समाधान मानावे लागले. महाराष्ट्राच्या दीप रामभिया व अक्षया वारंग या जोडीने बॅडमिंटनमधील मिश्र दुहेरीत के. सतीश कुमार व आद्या वरीयथ या तामिळनाडूच्या अग्रमानांकित जोडीला चिवट लढत दिली. मात्र, हा सामना तामिळनाडूच्या जोडीने 21-11,20-22,21-8 असा जिंकला.
परेड ग्राऊंडमधील हॉलमध्ये संपलेल्या मिश्र दुहेरीच्या अंतिम सामन्यात तामिळनाडूच्या सतीश व आद्या या जोडीने आजपर्यंत अनेक राष्ट्रीय स्तरावरील स्पर्धांमध्ये अव्वल दर्जाची कामगिरी केली असल्यामुळे त्यांचे पारडे जड मानले जात होते. दीप व अक्षया हे प्रथमच या स्पर्धेत एकत्र खेळत होते. तरीही त्यांनी अंतिम फेरीत स्थान मिळविताना अतिशय चांगला खेळ केला. महाराष्ट्राच्या जोडीचे राष्ट्रीय क्रीडा स्पर्धेतील पहिलेच पदक आहे.
