मुंबई। बांगलादेश क्रिकेट संघाचा फलंदाज सैफ हसन पुन्हा कोरोना टेस्टमध्ये पॉझिटिव्ह आढळला आहे. त्यामुळे हा काळ बांगलादेश क्रिकेट संघ आणि मंडळासाठी कठीण मानला जात आहे. सामान्यत: असे दिसून येते की, एखाद्या खेळाडूला कोरोनाचा संसर्ग झाल्यास त्याची दुसरी टेस्ट निगेटिव्ह येत आहे, परंतु सैफ हसन अद्याप कोरोना विषाणूने संक्रमित आहे, जे एक आश्चर्यकारक आहे.
बांगलादेश क्रिकेट बोर्डाच्या सूत्रांनी ईएसपीएन क्रिकइन्फोला सांगितले की, ‘सेैफ हसनची पहिली कोरोना टेस्ट सात दिवसापूर्वी करण्यात आली होती. सातव्या दिवशी पुन्हा कोरोना टेस्ट करण्यात आली होती, परंतु हसन दुसर्‍या टेस्टमध्येही पॉझिटिव्ह असल्याचे आढळले आहे.’ बांगलादेश क्रिकेट बोर्डाने श्रीलंकेच्या दौर्‍यासाठी निवडलेल्या 27 सदस्यांच्या प्राथमिक पथकात सैफ हसनची निवड केलेली नाही, कारण सध्या त्याला कोरोनाचा संसर्ग झाला आहे.
तथापि, जर सैफ हसनने लवकरच कोरोना विषाणूवर मात केला तर तो बांगलादेश कसोटी संघात दाखल होऊ शकतो. यावर्षी त्याने बांगलादेशकडून दोन कसोटी सामने खेळले आहेत.
देशांतर्गत क्रिकेटमध्ये शानदार कामगिरी केल्यानंतर या युवा फलंदाजाची निवड बीसीबीने राष्ट्रीय संघात केली. तो गेल्या वर्षी भारत दौऱ्यावर आलेल्या बांगलादेश संघाचा देखील भाग होता. पण तो पदार्पण करू शकला नाही.
या वर्षाच्या सुरुवातीला सैफने पाकिस्तानविरुद्ध रावळपिंडी मैदानावर पहिला कसोटी सामना खेळला आहे. फेब्रुवारी महिन्यात झिम्बाब्वेविरुद्धच्या एकमेव कसोटी सामन्यासाठी तो बांगलादेशच्या संघाचा देखील सदस्य होता. तथापि, श्रीलंका क्रिकेट मंडळाने, क्वारंटाइनच्या कालावधीत 14 दिवसांची वाढ केल्याने बांगलादेशचा श्रीलंका दौरा अद्याप संशयाच्या भोवर्‍यात सापडला आहे. आयसीसी वर्ल्ड टेस्ट चॅम्पियनशिप अंतर्गत, बांगलादेशीला 23 ऑक्टोबरपासून श्रीलंकेविरुद्ध कसोटी मालिका खेळायची आहे.
