कार्तिकने गाठला धोनी, आरसीबीच्या सलामीवीराला झेलबाद करत ‘या’ विक्रमांत बनला नंबर १

सोमवार रोजी (२० सप्टेंबर) अबु धाबीच्या शेख जायेद स्टेडियमवर कोलकाता नाईट रायडर्स विरुद्ध रॉयल चॅलेंजर्स बेंगलोर (केकेआर वि. आरसीबी) यांच्यात रोमांचक सामना झाला. केकेआरच्या खेळाडूंनी फलंदाजी अन् गोलंदाजीत शानदार प्रदर्शन करत आरसीबी संघाची दमछाक केली. अवघ्या १० षटकांत ९ विकेट्सने हा सामना जिंकत त्यांनी दुसऱ्या टप्प्याची अविस्मरणीय सुरुवात केली. या सामन्यादरम्यान यष्टीरक्षक दिनेश कार्तिक याने एक खास विक्रम केला आहे.

प्रथम फलंदाजीसाठी उतरलेल्या आरसीबीच्या डावादरम्यान कार्तिकने केकेआरकडून यष्टीमागे उपयुक्त कामगिरी केली. त्याने २२ धावांवर खेळत असलेल्या सलामीवीर देवदत्त पडीक्कलला लॉकी फर्ग्युसनच्या चेंडूवर झेलबाद केले. या झेलसह त्याने सर्वोत्कृष्ट यष्टीरक्षकांपैकी एक असलेल्या एमएस धोनी याच्या यष्टीमागे सर्वाधिक झेल घेण्याच्या विक्रमाची बरोबरी केली आहे.

तो आयपीएलमधील तब्बल ११४ झेलसह या विक्रमांत धोनीसह संयुक्तपणे अव्वलस्थानी विराजमान झाला आहे. या २ अनुभवी यष्टीरक्षकांशिवाय इतर कोणताही यष्टीरक्षक आयपीएलमध्ये यष्टीमागे १०० झेलही पकडू शकलेला नाही.

भलेही कार्तिकने यष्टीमागे सर्वाधिक झेल पकडण्याचा विक्रमात धोनीची बरोबरी केली आहे. पण सर्वाधिक विकेट्सच्या कामगिरीत तो अद्यापही धोनीपेक्षा मागे आहे. धोनीने आतापर्यंत २१२ आयपीएल सामने खेळताना एकूण १५३ विकेट्स घेतल्या आहेत. यात त्याच्या यष्टीमागील ११४ झेल आणि ३९ यष्टीचीत विकेट्सचा समावेश आहे. तर कार्तिक १४५ विकेट्ससह दुसऱ्या स्थानी आहे. त्याने ११४ झेल आणि ३१ यष्टीचीत विकेट्स घेतल्या आहेत.