मुंबई । इंग्लंड आणि ऑस्ट्रेलिया यांच्यातील तीन सामन्यांची वनडे मालिका नुकतीच संपली. ऑस्ट्रेलियाने ही मालिका 2-1 अशा फरकाने जिंकली. पहिल्या दोन सामन्यांनंतर दोन्ही संघ 1-1 असे बरोबरीत होते. तिसरा सामना जबरदस्त झाला. पहिल्या दोन चेंडूत दोन गडी गमावल्यानंतर इंग्लंडने धावफलकावर 302 धावा जमावल्या. इंग्लंडकडून जॉनी बेअरस्टोने 112 धावा केल्या. याशिवाय सॅम बिलिंग्ज आणि ख्रिस वोक्स यांनी अर्धशतके झळकावली.
ऑस्ट्रेलियालाही प्रत्युत्तरात चांगली सुरुवात मिळाली नव्हती. त्यांनी केवळ 73 च्या एकूण धावसंख्यापर्यंत पाच विकेट गमावल्या होत्या. अ‍ॅरॉन फिंच, मार्कस स्टोईनिस, डेव्हिड वॉर्नर, मिशेल मार्श आणि मार्नस लब्युचेन हे सर्व माघारी परतले होते. ऑस्ट्रेलिया पुन्हा पराभूत होईल असं वाटत होतं. पण सामन्या दरम्यान अशी एक घटना घडली की सामना ऑस्ट्रेलियाकडे झुकला.
पहिले पाच विकेट गमावल्यानंतर ग्लेन मॅक्सवेल आणि अ‍ॅलेक्स कॅरी यांनी हळू हळू ऑस्ट्रेलियाचा डाव सांभाळायला सुरुवात केली. दोघांनी हळू हळू धावा करायला सुरुवात केली. डावातील 20 वे षटक चालू होते. इंग्लंडचा वेगवान गोलंदाज जोफ्रा आर्चर चांगला लयीत दिसत होता. पहिल्या तीन चेंडूंवर त्याने फक्त एक धाव दिली. कॅरीने चौथ्या चेंडूवर थर्ड मॅनच्या दिशेने फटका मारला आणि तिथे उभे असलेल्या आदिल रशिदने अलगत झेल टिपला.
ऑस्ट्रेलियाची सहावी विकेट पडली म्हणून इंग्लंडच्या गोटात आनंदाचे वातावरण पसरले, परंतु पंचांनी नोबॉल घोषित करताच त्यांच्या आनंदावर पाणी फेरले. रीप्लेमध्ये असे दिसून आले की चेंडू टाकताना जोफ्रा आर्चर क्रीझच्या खूप पुढे आला होता. कॅरीला जीवनदान मिळाले आणि त्याने उत्कृष्ट 106 धावा केल्या आणि दुसरा शतकवीर ग्लेन मॅक्सवेल (108 धावा) सोबत सहाव्या विकेटसाठी 212 धावांची भागीदारी केली. या दोन शतकाच्या जोरावर ऑस्ट्रेलियाने सामना आणि मालिका दोन्ही जिंकली आहे.
