कोच द्रविडने केली ईशान किशनची पाठराखण; सांगितले वारंवार संधी देण्याचे कारण

भारत आणि वेस्ट इंडीज (ind vs wi) यांच्यात नुकतीच मायदेशातील टी-२० मालिका पार पडली. युवा यष्टीरक्षक फलंदाज ईशान किशन (ishan kishan) याला रोहित शर्मासोबत डावाची सुरुवात करण्याची संधी मिळाली. पण तो अपेक्षित प्रदर्शन करू शकला नाही. अशात भारताचे मुख्य प्रशिक्षक राहुल द्रविड (rahul dravid) यांनी ईशानची पाठराखण करण्याचे काम केले आहे.

वेस्ट इंडीजविरुद्धच्या पहिल्या टी-२० सामन्यात ईशान किशनने ३५, दुसऱ्या सामन्यात १०, तर तिसऱ्या सामन्यात ३१ धावा केल्या होत्या. या प्रदर्शनानंतर त्याच्यावर टीका झाली. पण राहुल द्रविड मात्र त्याच्या बाजून उभे राहिले आहेत. पत्रकार परिषदेत बोलताना द्रविड म्हणाले, “आम्ही स्वतःला फक्त १५ खेळाडूंपर्यंत मर्यादित ठेऊ इच्छित नाही. आम्ही खेळाडूंना संधी देऊ इच्छितो. आम्हाला हे सुनिच्छित आहे की, जेव्हा आम्ही विश्वचषक खेळायला जाऊ, तेव्हा आमच्या प्रत्येक खेळाडूकडे किमान १५-२० सामन्यांचा अनुभव असावा. यामुळे रोहितला त्याच्यासोबत संतुलन बनवण्याची संधी मिळेल. आम्हाला एखाद्या खेळाडूला दुखापत झाल्यानंतर बॅक अपच्या रूपात काही खेळाडू पाहिजेत.”