‘वाटलं होतं की मला बोलावण येईल, पण..,’ ११ वर्षांपासून पुनरागमनाच्या प्रतिक्षेत असलेल्या भारतीय गोलंदाजाचं विधान

भारतीय क्रिकेट संघाचा कर्णधार विराट कोहली सध्या प्रतिभाशाली युवा क्रिकेटपटूंना संधी देताना दिसत आहे. मागील ऑस्ट्रेलिया दौऱ्यापासून बऱ्याचशा नवोदित शिलेदारांची भारतीय संघात पदार्पण करण्याची स्वप्ने पूर्ण झाली आहेत. अनेकांनी त्यांना मिळालेल्या संधीचे सोने करत संघातील आपले स्थानही पक्के केले आहे. यामुळे काही कारणास्तव संघाबाहेर झालेल्या अनुभवी खेळाडूंना पुनरागमनाची संधी मिळत नसल्याचे दिसत आहे. यातील एक नाव म्हणजे, २९ वर्षीय भारतीय वेगवान गोलंदाज जयदेव उनाडकट.

देशांतर्गत क्रिकेटमध्ये सातत्याने लक्षणीय प्रदर्शन करुनही उनाडकट भारतीय संघातील त्याचे स्थान परत मिळवू शकलेला नाही. २०२०-२१ मधील भारताचा ऑस्ट्रेलिया दौरा किंवा इंग्लंडच्या भारत दौऱ्यावर आपल्याला संधी मिळेल अशी त्याला आस होती. परंतु पुन्हा एकदा आपल्यावर दुर्लक्ष केले गेल्याने त्याने निराशा व्यक्त केली आहे.

उनाडकट म्हणाला की, “मी आता माझ्या कारकिर्दीच्या शिखरावर आहे. मी मागील काही काळात शानदार प्रदर्शन केले आहे. त्यामुळे मला अपेक्षा होती की, आता तरी मला भारतीय संघाकडून बोलावण येईल. परंतु तसे झाले नाही. मला मान्य आहे, बऱ्याचशा क्रिकेट स्पर्धा रद्द झाल्याने माझ्या संधी कमी झाल्या. याचा परिणाम असा झाला आहे की, प्रत्येक क्रिकेट मालिकेसाठी बोर्डाने एक मोठा पूल तयार केला आहे. यामुळे प्रत्येक खेळाडूसाठी मोठी संधी निर्माण झाली आहे. तरीही माझी निवड होणे निश्चितपणे निराशादायी होते.”

ऑस्ट्रेलिया दौऱ्यावरील ४ सामन्यांच्या कसोटी मालिकेदरम्यान जसप्रीत बुमराह, मोहम्मद शमी, उमेश यादव या अनुभवी गोलंदाजांना दुखापती झाल्या होत्या. त्यांच्याजागी शार्दुल ठाकूर, मोहम्मद सिराज, टी नटरजामन या युवा गोलंदाजांना संधी मिळाल्या. परंतु प्रथम श्रेणी क्रिकेटचा स्टार क्रिकेटपटू उनाडकटला संधी दिली गेली नाही.

याबाबत बोलताना उनाडकट म्हणाला की, “ऑस्ट्रेलिया दौऱ्यावर संघातील बरेचसे गोलंदाज दुखापतग्रस्त झाले होते. तरीही माझा विचार केला गेला नाही, हे पाहून खूप दु:ख झाले. सुरुवातीला संघातील प्रत्येक खेळाडू पूर्णपणे तंदुरुस्त होता त्यामुळे हरकत नव्हती. परंतु पुढे संधी निर्माण झाल्या होत्या. अशावेळी मी संघात जागा मिळण्याचा हक्कदार होतो, असे मला वाटते.”