भारत आणि न्यूझीलंडचे (IND vs NZ) संघ चौथ्या टी-20 साठी वायझॅग म्हणजेच विशाखापट्टणमच्या एसीए-वीडीसीए (ACA-VDCA) क्रिकेट स्टेडियमवर मैदानात उतरतील. हा सामना बुधवारी (28 जानेवारी) खेळला जाईल. भारतीय वेळेनुसार सामन्याची सुरुवात संध्याकाळी 7 वाजल्यापासून होईल. दरम्यान, सामन्यापूर्वी चाहते स्टेडियमच्या पिचबद्दल जाणून घेण्यासाठी खूप उत्सुक दिसत आहेत.
मालिकेच्या सुरुवातीच्या 2 टी-20 सामन्यांमध्ये 200 धावांचा टप्पा ओलांडला गेला. त्यानंतर तिसऱ्या सामन्यात सूर्यकुमार यादवच्या नेतृत्वाखालील टीम इंडियाने 154 धावांच्या लक्ष्याचा पाठलाग करताना केवळ 10 ओव्हरमध्ये विजय मिळवला होता. त्यामुळे तिन्ही सामन्यांमध्ये फलंदाजांचे वर्चस्व पाहायला मिळाले आहे. आता प्रश्न असा उपस्थित होत आहे की चौथ्या टी-20 मध्ये पिचचे वर्तन कसे असेल? वायझॅगमध्येही फलंदाजांची चंगळ असेल की गोलंदाज कहर माजवतील? जाणून घेऊया खेळपट्टीचा अंदाज कसा असू शकतो.
वायझॅगचे एसीए-वीडीसीए क्रिकेट स्टेडियम फलंदाजांसाठी अनुकूल मानले जाते. स्टेडियममध्ये फॉरमॅटनुसार पिच तयार केली जाते. जर टी-20 सामना असेल, तर फलंदाजांना जास्त सपोर्ट पाहायला मिळतो. सुरुवातीच्या तीन सामन्यांप्रमाणेच या मैदानावरही धडाकेबाज फलंदाजी पाहायला मिळू शकते. तत्पूर्वी, वेगवान गोलंदाजांना बाऊन्ससह मदत मिळू शकते. तसेच मैदानाची बाउंड्री मोठी आहे, ज्यामुळे फलंदाजांसाठी सतत धावा काढणे थोडे आव्हानात्मक ठरू शकते. स्टेडियमच्या हाय स्कोअरबद्दल बोलायचे झाले तर, टी-20 इंटरनॅशनलमध्ये या मैदानावर 209/8 धावांचा हाय स्कोअर नोंदवला गेला आहे, जो टीम इंडियाने नोव्हेंबर 2023 मध्ये ऑस्ट्रेलियाविरुद्ध बनवला होता.
