२-३ वर्षांचा गॅप राहूनही ठोकले अर्धशतक, आता स्वत:च्याच खेळीबद्दल वाटतंय आश्चर्य!

नवी दिल्ली। आयपीएलच्या १३ व्या हंगामातील तिसरा सामना दुबई आंतरराष्ट्रीय स्टेडिअम, दुबई येथे सनरायझर्स हैद्राबाद आणि रॉयल चॅलेंजर्स बेंगलोर संघात पार पडला. स्पर्धेतील पहिल्याच सामन्यात आरसीबीने विजय मिळविला. मागील ३ वर्षांमध्ये असे पहिल्यांदाच झाले, जेव्हा स्पर्धेचा पहिल्याच सामन्यात संघाला पराभवाचा सामना करावा लागला नाही. या सामन्यादरम्यान आरसीबीचा अनुभवी फलंदाज एबी डिविलियर्सने शानदार अर्धशतक ठोकल्यामुळे तो आनंदी दिसला. संघाच्या विजयावर आणि आपल्या खेळीबद्दल बोलताना तो म्हणाला, दीर्घ काळानंतर पुनरागमन करणे चांगले वाटत आहे.

हैद्राबाद संघाविरुद्ध प्रथम फलंदाजी करताना आरसीबी संघाने देवदत्त पडिक्कल आणि डिविलियर्सच्या अर्धशतकाच्या जोरावर ५ बाद १६३ धावसंख्या उभारली होती. आरसीबीच्या १६४ धावांच्या आव्हानाचा पाठलाग करताना हैद्राबाद संघ १९.४ षटकातच १५३ धावांवर सर्वबाद झाला होता. अशाप्रकारे बेंगलोरने हा सामना १० धावांनी जिंकला.

डिविलियर्स आपल्या खेळीबद्दल बोलताना म्हणाला, “प्रामाणिकपणे सांगायचं झालंं, तर मी स्वत: च्या कामगिरीने आश्चर्यचकित झालो आहे. मी दक्षिण आफ्रिकेत एक स्पर्धात्मक क्रिकेट खेळलो होतो, जो खूप चांगला होता. माझ्यासाठी हे आवश्यक होते की तिथे जाऊन खेळू आणि इथे आत्मविश्वास घेऊन येऊ. इथे भारत आणि ऑस्ट्रेलियाचे अनेक प्रतिभावान खेळाडू येत आहेत. आम्ही आज जॉश फिलिपला पाहिले. तो चांगला खेळाडू आहे.”

डिविलियर्सने हैद्राबादविरुद्ध खेळताना ३० चेंडूत ५१ धावांची खेळी केली. यामध्ये २ षटकार आणि ४ चौकारांचा समावेश होता. यादरम्यान त्याचा स्ट्राईक रेट हा १७० इतका होता. वेगवान धाव घेण्याच्या प्रयत्नात तो धावबाद झाला. परंतु त्याने संघाला समाधानकारक धावसंख्येपर्यंत पोहोचवले.