नवी दिल्ली। आयपीएलच्या १३ व्या हंगामातील तिसरा सामना दुबई आंतरराष्ट्रीय स्टेडिअम, दुबई येथे सनरायझर्स हैद्राबाद आणि रॉयल चॅलेंजर्स बेंगलोर संघात पार पडला. स्पर्धेतील पहिल्याच सामन्यात आरसीबीने विजय मिळविला. मागील ३ वर्षांमध्ये असे पहिल्यांदाच झाले, जेव्हा स्पर्धेचा पहिल्याच सामन्यात संघाला पराभवाचा सामना करावा लागला नाही. या सामन्यादरम्यान आरसीबीचा अनुभवी फलंदाज एबी डिविलियर्सने शानदार अर्धशतक ठोकल्यामुळे तो आनंदी दिसला. संघाच्या विजयावर आणि आपल्या खेळीबद्दल बोलताना तो म्हणाला, दीर्घ काळानंतर पुनरागमन करणे चांगले वाटत आहे.
हैद्राबाद संघाविरुद्ध प्रथम फलंदाजी करताना आरसीबी संघाने देवदत्त पडिक्कल आणि डिविलियर्सच्या अर्धशतकाच्या जोरावर ५ बाद १६३ धावसंख्या उभारली होती. आरसीबीच्या १६४ धावांच्या आव्हानाचा पाठलाग करताना हैद्राबाद संघ १९.४ षटकातच १५३ धावांवर सर्वबाद झाला होता. अशाप्रकारे बेंगलोरने हा सामना १० धावांनी जिंकला.
डिविलियर्स आपल्या खेळीबद्दल बोलताना म्हणाला, “प्रामाणिकपणे सांगायचं झालंं, तर मी स्वत: च्या कामगिरीने आश्चर्यचकित झालो आहे. मी दक्षिण आफ्रिकेत एक स्पर्धात्मक क्रिकेट खेळलो होतो, जो खूप चांगला होता. माझ्यासाठी हे आवश्यक होते की तिथे जाऊन खेळू आणि इथे आत्मविश्वास घेऊन येऊ. इथे भारत आणि ऑस्ट्रेलियाचे अनेक प्रतिभावान खेळाडू येत आहेत. आम्ही आज जॉश फिलिपला पाहिले. तो चांगला खेळाडू आहे.”
डिविलियर्सने हैद्राबादविरुद्ध खेळताना ३० चेंडूत ५१ धावांची खेळी केली. यामध्ये २ षटकार आणि ४ चौकारांचा समावेश होता. यादरम्यान त्याचा स्ट्राईक रेट हा १७० इतका होता. वेगवान धाव घेण्याच्या प्रयत्नात तो धावबाद झाला. परंतु त्याने संघाला समाधानकारक धावसंख्येपर्यंत पोहोचवले.
“जेव्हा तुम्ही इथे खेळायला येता आणि तुम्ही अधिक क्रिकेट खेळलेला नसता, तेव्हा तुम्हाला स्वत:बद्दल शंका निर्माण होते. परंतु आम्ही एक संघ म्हणून मागील काही आठवड्यांपासून खूप मेहनत घेतली होती. आणि एक फलंदाज म्हणून फॉर्ममध्ये येण्यासाठीही सराव केला होता. आज रात्री आमची सुरुवात खूप सुखकार होती. दुर्दैवाने शेवटी मी धावबाद झालो. परंतु मी खूप आनंदी आहे की खेळाचे सर्व पैलू व्यवस्थित आहेत.”
डिविलियर्सने आपला शेवटचा आंतरराष्ट्रीय सामना बांगलादेशविरुद्ध २०१७ मध्ये खेळला होता.
महत्त्वाच्या बातम्या-
-चेन्नई विरुद्ध राजस्थानच्या आजच्या सामन्यात ‘या’ दोन भावात होईल टक्कर
-‘या’ अष्टपैलू खेळाडूला गोलंदाजी करताना झाली दुखापत; सोडावे लागले मैदान
-या स्टार खेळाडूंची प्लेयिंग इलेव्हनमध्ये निवड न केल्यामुळे हैद्राबाद संघाला बसला फटका
ट्रेंडिंग लेख-
-आयपीएल पदार्पणात अर्धशतक करणारे सर्वात युवा ४ फलंदाज
-पंजाबविरुद्धच्या पहिल्याच सामन्यात दिल्लीचे ‘हे’ ५ खेळाडू खेळले नसते तर काही खरं नव्हतं
-विराट कोहली-डेव्हिड वॉर्नरच्या संघांची संभावित प्लेइंग इलेव्हन, पहा कुणाला मिळेल जागा