भारत विरुद्ध ऑस्ट्रेलिया यांच्या दरम्यान उद्यापासून (१७ डिसेंबर) प्रतिष्ठित बॉर्डर-गावसकर ट्रॉफी सुरू होणार आहे. या मालिकेसाठी दोन्ही संघातील खेळाडू पूर्णपणे सज्ज आहेत. सामन्यापूर्वी भारतीय कर्णधार विराट कोहली व ऑस्ट्रेलियाचा अनुभवी फलंदाज स्टीव स्मिथ यांच्यातील चर्चेचा व्हिडीओ बीसीसीआयने आपल्या ट्विटर हँडलवरून शेअर केला. या व्हिडिओमध्ये विराट ऑस्ट्रेलियाच्या गोलंदाजांचे कौतुक करताना दिसला.
बीसीसीआयने शेअर केला व्हिडिओ
ऍशेस इतकीच महत्त्वाची समजली जाणाऱ्या भारत-ऑस्ट्रेलिया यांच्यातील बॉर्डर-गावसकर ट्रॉफीमध्ये विराट व स्मिथ यांच्या कामगिरीवर सर्वांचे लक्ष असेल. स्मिथ नेहमीच भारताविरुद्ध उत्कृष्ट फलंदाजी करतो. या मालिकेतही स्मिथकडून सर्वांना अपेक्षा आहेत. विराट मालिकेतील पहिला सामना खेळल्यानंतर पालकत्व रजा घेऊन भारतात परत येईल. तत्पूर्वी, या दोन समकालीन सर्वोत्कृष्ट खेळाडूंमध्ये झालेल्या चर्चेचा एक व्हिडीओ बीसीसीआयने आपल्या अधिकृत ट्विटर हँडलवरून शेअर केला आहे.
ऑस्ट्रेलियाच्या गोलंदाजांचे केले विराटने कौतुक
या व्हिडिओमध्ये विराट ऑस्ट्रेलियाच्या गोलंदाजांचे कौतुक करताना दिसून आला. विराटने म्हटले की, “मागील वेळी आम्ही ऑस्ट्रेलियात खेळलो तेव्हा निकाल आमच्या बाजूने राहिला. तू आणि वॉर्नर अनुपस्थित होता तरीही आमचा सामना एका उत्कृष्ट गोलंदाजी आक्रमणासोबत झाला होता. यावेळीही त्यात काहीही बदल झाला नाही. आम्ही पुन्हा एकदा त्यांचा सामना करण्यासाठी उत्सुक आहोत. स्टार्क, कमिन्स, हेजलवूड व लायन हे सर्व अप्रतिम गोलंदाज आहेत. तू आणि वॉर्नर परतल्याने तुमचा संघ मजबूत भासतोय.”
भारताने मिळवला होता मागील मालिकेत विजय
भारत आणि ऑस्ट्रेलिया यांच्या दरम्यान २०१८-२०१९ मध्ये खेळल्या गेलेल्या बॉर्डर-गावसकर ट्रॉफीमध्ये भारताने ऑस्ट्रेलियाला प्रथमच ऑस्ट्रेलियात पराभूत करण्याची किमया करून दाखवली होती. या मालिकेत भारताने २-१ ने विजय मिळवलेला. स्टीव स्मिथ व डेविड वॉर्नर हे बॉल टेम्परिंग प्रकरणात दोषी आढळल्याने, त्यांच्यावर निलंबनाची कारवाई करण्यात आली होती.
महत्वाच्या बातम्या:
– ऑस्ट्रेलियाविरुद्धच्या पहिल्या कसोटीसाठी भारतीय प्लेईंग इलेव्हनची घोषणा; या खेळाडूला मिळाली संधी
– पहिल्या कसोटी सामन्यापूर्वी ऑस्ट्रेलिया संघाची घोषणा, या अष्टपैलूला तब्बल ४ वर्षांनंतर स्थान
– कोहली-स्मिथ दरम्यान रंगला प्रश्नोत्तरांचा खेळ; विराटने दिली दिलखुलास उत्तरे