आयपीएलच्या १३व्या हंगामातील तिसरा सामना आज सनरायझर्स हैद्राबाद विरुद्ध रॉयल चॅलेंजर बेंलगोर संघात होत आहे. दुबई आंतरराष्ट्रीय क्रिकेट स्टेडियम, दुबई येथे हा सामना होत आहे. विराट कोहली रॉयल चॅलेंजर बेंलगोर संघाचे तर सनरायझर्स हैद्राबादचे नेतृत्त्व डेविड वॉर्नर करत आहे.
सनरायझर्स हैद्राबादचा कर्णधार डेविड वॉर्नरने नाणेफेक जिंकत या सामन्यात प्रथम गोलंदाजी करण्याचा निर्णय घेतला आहे. या सामन्यात विराट नेतृत्त्व करत असलेल्या बेंगलोर संघाची देवदत्त पडिक्कल व ऍरॉन फिंच ही नवी जोडी सलामीला आली. आयपीएल १३ हंगामात मिळून तब्बल ५९व्या वेगळ्या जोडीला आरसीबीने मैदानात उतरवले आहे.
आयपीएलमध्ये सर्वाधिक वेळा वेगळ्या जोड्या सलामीला खेळविण्याचा एकप्रकारे नकोसा विक्रम आरसीबीच्या नावावर झाला आहे. असे असले तरी या आयपीएलमध्ये पहिलाच सामना खेळत असलेला देवदत्त पडिक्कल हा २० वर्षीय खेळाडू चांगला खेळताना दिसत आहे.
आयपीएलमध्ये आरसीबीनंतर सर्वाधिक वेळा वेगळी जोडी उतरविण्याचा विक्रम मुंबई इंडियन्सच्या नावावर आहे. त्यांनी तब्बल ४७ वेळा हा नकोसा पराक्रम केला आहे.
सर्वाधिक वेळा आयपीएलमध्ये सलामीला वेगळी जोडी घेऊन खेळणारे संघ-
५९- बेंगलोर, ४७- मुंबई, ४४- पंजाब, ३९- राजस्थान, ३८- दिल्ली, ३२- कोलकाता, २२- चेन्नई, १९- हैद्राबाद, १४- डेक्कन, १३- पुणे वॉरियर्स, ६- गुजरात, ५- कोची, ५- रायझिंग पुणे
