नुकत्याच संपलेल्या बॉर्डर-गावसकर कसोटी मालिकेत ऑस्ट्रेलियन संघाला भारताकडून आपल्याच देशात लाजिरवाणा पराभव पत्करावा लागला. प्रमुख खेळाडूंच्या अनुपस्थितीतही नवख्या भारतीय खेळाडूंनी ऑस्ट्रेलियाला पाणी पाजले. ऑस्ट्रेलियाची या मालिकेत निष्प्रभ ठरलेली गोलंदाजी हे त्यांच्या पराभवाचे एक मुख्य कारण होते.
त्यामुळे आता त्यांच्यावर चहुबाजूंनी टीका होते आहे. त्यात आता ऑस्ट्रेलियाचा माजी कर्णधार रिकी पॉंटिंगनेही उडी घेतली आहे. त्याने ऑस्ट्रेलियाचा डावखुरा वेगवान गोलंदाज मिचेल स्टार्कवर टीका केली आहे. स्टार्क चेंडू स्विंग करू शकत नसेल तर त्याच्या जागी दुसऱ्या गोलंदाजाला संघात स्थान द्या, अशी मागणी पॉंटिंगने केली आहे.
“दक्षिण आफ्रिकेविरुद्ध दुसऱ्या गोलंदाजाला द्या संधी”
मिचेल स्टार्कने भारताविरुद्धच्या संपूर्ण मालिकेत चार सामन्यात मिळून केवळ ११ गडी बाद केले. त्याचवेळी दुसऱ्या बाजूला भारताचा वेगवान गोलंदाज मोहम्मद सिराजने तीनच सामने खेळून देखील १३ बळी पटकाविले. स्टार्कची गोलंदाजी पूर्ण मालिकेत प्रभावहीन वाटली. म्हणूनच पॉंटिंगने आगामी दक्षिण आफ्रिकेविरुद्धच्या मालिकेत स्टार्कच्या जागी इतर कुठल्या गोलंदाजाला संधी द्यावी, असे विधान केले आहे.
एका वेबसाईटशी बोलताना पॉंटिंग म्हणाला, “ही तंत्राची बाब आहे. कदाचित तो खूप जास्त थकला असेल. त्याला विश्रांतीची गरज असेल. पण कोचने तो चेंडू स्विंग करतो आहे की नाही याकडे लक्ष द्यायला हवे. कारण दक्षिण आफ्रिकेत चेंडू अधिक स्विंग होत असतो. आपल्याला सगळ्यांना याची कल्पना आहे की चेंडू स्विंग होऊ लागल्यावर स्टार्क अतिशय धोकादायक गोलंदाज सिद्ध होतो.”
दरम्यान, ऑस्ट्रेलियन संघासाठी दक्षिण आफ्रिकेविरुद्धची मालिका अतिशय महत्वाची आहे. जागतिक कसोटी अजिंक्यपद स्पर्धेच्या अंतिम फेरीत प्रवेश मिळवायचा असल्यास त्यांना या मालिकेत विजय आवश्यक आहे. त्यामुळे पॉंटिंगचा सल्ला ऑस्ट्रेलियन संघ व्यवस्थापन मनावर घेणार का, हे पाहावे लागेल.
महत्वाच्या बातम्या:
ब्रेकिंग! तब्बल सात खेळाडू ठरले पद्मश्री पुरस्काराचे मानकरी, भारत सरकारने केली घोषणा