भारत आणि वेस्ट इंडीज (ind vs wi odi series) यांच्यातील मायदेशात खेळली जाणारी एकदिवसीय मालिका ६ फ्रेबुवारीपासून सुरू होणार आहे. नियमित कर्णधार रोहित शर्मा (rohit sharma) संघात पुनरागमन करणार आहे. मात्र, उपकर्णधार केएल राहुल (kl rahul) मात्र पहिल्या एकदिवसीय सामन्यात अनुपस्थित असेल. राहुलच्या अनुपस्थितीत रिषभ पंत (rishabh pant) वर उपकर्णधारपदाची जबाबदारी सोपवली जाऊ शकते. बीसीसीआयच्या एका अधिकाऱ्याकडून यासंदर्भात महिती मिळाली आहे.
केएल राहुल पहिल्या एकदिवसीय सामन्यासाठी अनुपस्थितीत आहे. तर दुसरीकडे संघाचा दुसरा उपकर्णधार जसप्रीत बुमराह (jasprit bumrah) याला वेस्ट इंडीजविरुद्धच्या संपूर्ण मालिकेत विश्रांती दिली गेली आहे. अशात संघातील इतर खेळाडूंकडे पहिल्या सामन्यात उपकर्णधार बनण्याची संधी तयार झाली आहे. शिखर धवनने मागच्या वर्षी श्रीलंका दौऱ्यात संघाचे नेतृत्व केले होते. परंतु वेस्ट इंडीजविरुद्धच्या पहिल्या एकदिवसीय सामन्यात रिषभ पंत उपकर्णधाराची जबाबदारी सांभाळेल, अशी शक्यता आहे.
बीसीसीआय अधिकाऱ्याने यासंदर्भात सविस्तर माहिती दिली आहे. एका क्रिडा संकेतस्थळानी बोलताना अधिकारी म्हणाला की, “हे पाहा, ही फक्त एका सामन्याची गोष्ट आहे. कारण, केएल राहुल दुसऱ्या सामन्यापासून मालिकेत सामील होईल. शिखर आणि रिषभ दोघेही उपकर्णधार बनण्यासाठी दावेदार आहेत. एका यष्टीरक्षकाच्या भूमिकेत रिषभ तसाही कर्णधाराला रिव्यू आणि क्षेत्ररक्षणच्या निर्णयात खूप काही सांगतो. जर या दृष्टीकोणातून पाहिले तर, त्याला उपकर्णधार बनवले जाऊ शकते.”
दरम्यान, विराट कोहलीने कसोटी कर्णधारपद सोडल्यानंतर रिषभ पंत आणि केएल राहुल हे दोघे कसोटी कर्णधारपदासाठी दावेदार आहेत. रिषभ पंतने आयपीएलमध्ये दिल्ली कॅपिटल्स संघाचे नेतृत्व चांगल्या प्रकारे पार पाडले आहे. अशात बीसीसीआय आणि निवडकर्ते त्याचे नेतृत्व आजमावून पाहू शकतात, जेणेकरून भविष्यात त्याचा संघाला फायदा होईल.
दरम्यान, वेस्ट इंडीजविरुद्ध तीन सामन्याची एकदिवसीय मालिका संपल्यानंतर उभय संघात तीन सामनयांची टी२० मालिका खेळली जाईल. एकदिवसीय मालिकेचे सामने ६, ९ आणि ११ फेब्रुवारीला खेळले जातील. त्यानंतर टी२० मालिकेतील पहिला सामना १६ फेब्रुवारीला खेळला जाईल. पुढचे दोन टी२० सामने १८ आणि २० फेब्रुवारीला खेळले जातील.