गेल्या वर्षी उन्हाळ्यात घडलेल्या दुर्दैवी घटनांनंतर चिन्नास्वामी स्टेडियम आता आपल्या पहिल्या आयपीएल सामन्याच्या यजमानपदासाठी सज्ज होत आहे. या वेदनादायक घटनेत आपला जीव गमावलेल्या ११ चाहत्यांना श्रद्धांजली वाहण्यासाठी रॉयल चॅलेंजर्स बेंगळुरू (RCB) व्यवस्थापनाने खास पावले उचलली आहेत. लिव्हरपूलच्या ‘हिल्सबोरो स्मारक’ सारख्या जागतिक क्रीडा श्रद्धांजलीच्या धर्तीवर, RCB आतापासून होणाऱ्या सर्व सामन्यांमध्ये स्टेडियममधील ११ जागा कायमस्वरूपी रिकाम्या ठेवणार आहे. ही चेंगराचेंगरी टीमच्या पहिल्या विजेतेपदाचा जल्लोष साजरा करताना झाली होती. हा सन्मान पुढे नेत, या हंगामातील सर्व सराव सत्रांदरम्यान खेळाडू ११ क्रमांकाची जर्सी परिधान करतील. स्टेडियमच्या आतील गेटजवळ एक स्मृती स्मारक देखील उभारले जाईल, जेणेकरून चेंगराचेंगरीतील बळींना मौन श्रद्धांजली वाहण्यासाठी एक खास जागा उपलब्ध होईल.
विशेष म्हणजे, जून २०२५ मध्ये झालेल्या भीषण चेंगराचेंगरीनंतर एम. चिन्नास्वामी स्टेडियमला एक प्रमुख क्रिकेट ठिकाण म्हणून काही काळ बाजूला राहावे लागले होते. न्यायमूर्ती जॉन मायकल डी’कुन्हा आयोगाने हे मैदान “मूलभूतपणे असुरक्षित” असल्याचे घोषित केल्यानंतर, या मैदानाकडून २०२५ चा आयसीसी महिला वनडे वर्ल्ड कप आणि २०२६ चा पुरुष टी-२० वर्ल्ड कप आयोजित करण्याचे अधिकार काढून घेण्यात आले होते.
आयपीएल २०२६ मध्ये आरसीबीचा पहिला सामना हैदराबादविरुद्ध होणार आहे. या सामन्यात आरसीबीचा संघ रजत पाटीदारच्या नेतृत्वाखाली, तर सनरायझर्स हैदराबादचा संघ ईशान किशनच्या नेतृत्वाखाली मैदानात उतरेल. याही वेळी सर्वांच्या नजरा पुन्हा एकदा विराट कोहलीवर खिळलेल्या असतील.
