भारत विरुद्ध इंग्लंड संघात 5 फेब्रुवारीपासून 4 सामन्यांची कसोटी मालिका सुरु होणार आहे. या मालिकेतील पहिले 2 सामने चेन्नई येथे होणार आहेत. या मालिकेतील पहिल्या कसोटी सामन्यासाठी भारतीय संघाकडून अंतिम 11 जणांच्या संघात रिषभ पंतला स्थान मिळणार हे पक्के झाले आहे.
भारताचा कर्णधार विराट कोहलीने गुरुवारी (4 फेब्रुवारी) पत्रकार परिषदेमध्ये याबाबत माहिती दिली आहे. तो म्हणाला, ‘रिषभ पंत उद्या असेल. त्याने ऑस्ट्रेलियामध्ये खेळताना प्रभाव पाडला आहे आणि तो चांगल्या लयीत आहे. त्यामुळे आम्हाला त्याला कायम ठेवायचे आहे. त्याने आयपीएलनंतर चांगली कामगिरी केली असून त्याने त्याच्या फिटनेसवर आणि त्याच्या खेळावर काम केले आहे. त्याला चांगले खेळताना पाहून आनंद झाला आहे.’
याशिवाय विराटने जसप्रीत बुमराह देखील अंतिम 11 जणांच्या संघात असेल असा इशारा दिला आहे. त्याने म्हटले आहे की जसप्रीत बुमराह मायदेशात पहिला कसोटी सामना खेळण्यास उत्सुक असेल. तसेच इशांत शर्मा आणि मोहम्मद सिराज सारखे पर्याय पाहूनही आम्हाला आनंद होत आहे.
रिषभ पंतची ऑस्ट्रेलियाच शानदार कामगिरी
रिषभ पंतने नुकत्याच काही दिवसांपूर्वी पार पडलेल्या ऑस्ट्रेलिया दौऱ्यात शानदार कारमगिरी केली होती. त्याने भारताला कसोटी मालिका जिंकून देण्यात मोलाचा वाटा उचलला होता. त्याने 3 कसोटी सामन्यात 68.50 च्या सरासरीने 274 धावा केल्या होत्या. यात त्याने सिडनी कसोटीत केलेल्या 97 धावा आणि ब्रिस्बेन कसोटी केलेल्या नाबाद 89 धावांच्या खेळींचाही समावेश आहे. आता रिषभ इंग्लंडविरुद्ध मायदेशात क्रिकेट खेळण्यास सज्ज झाला आहे.
बुमराहचा भारतातील पहिला कसोटी सामना –
वेगवान गोलंदाज जसप्रीत बुमराहने जानेवारी 2018 मध्ये कसोटी क्रिकेटमध्ये पदार्पण केले होते. मात्र, तो तेव्हापासून गेले 3 वर्षे मायदेशाबाहेरच कसोटी सामने खेळला आहे. त्याला एकदाही भारतात कसोटी सामना खेळण्याची संधी मिळाली नाही. पण, आता त्याची इंग्लंड विरुद्ध मायदेशात होणाऱ्या कसोटी मालिकेतील पहिल्या 2 सामन्यांसाठी भारतीय संघात निवड झाली आहे. त्यामुळे तो मायदेशातील पहिला कसोटी सामना खेळण्यास सज्ज आहे.
इंग्लंडविरुद्धचा पहिला कसोटी सामना 5 फेब्रुवारीपासून भारतीय प्रमाणवेळेनुसार सकाळी 9.30 वाजता सुरु होणार आहे.
महत्त्वाच्या बातम्या –
रिषभ पंतची इंग्लंडविरुद्ध पहिल्या कसोटीसाठी 11 जणांच्या संघात जागा पक्की, विराटने दिली माहिती
व्वा रे व्वा! दुखापतीमुळे चेन्नई कसोटीतून बाहेर असलेल्या शमीने गुंतवले व्यवसायात मन, पाहा फोटो
‘छम्मा छम्मा’ गाण्यावर धरला युझवेंद्र चहलच्या बायकोने ठेका, व्हिडिओ भन्नाट व्हायरल