जगभरात थैमान घातलेल्या कोरोना महामारीने लोकांना वेगवेगळ्या गोष्टी शिकवल्या आहेत. भारताचा कर्णधार विराट कोहलीलाही कोरोना काळात सामन्यादरम्यान स्लेजिंग करणे ही व्यर्थ गोष्ट असल्याची जाणीव झाली आहे. त्याने ऑस्ट्रेलियाविरुद्धच्या कसोटी मालिकेदरम्यान स्लेजिंग न करण्याचे वचनही घेतले आहे. पण विरोधी संघाचा कर्णधार टीम पेनने गरज पडल्यास या अस्त्राचा वापर करण्यापासून मागे हटणार नसल्याचे सांगितले आहे.
गुरुवारपासून (१७ डिसेंबर) ऍडलेड येथे भारत विरुद्ध ऑस्ट्रेलिया संघात पहिल्या कसोटी सामना खेळला जाणार आहे. तत्पूर्वी माध्यमांशी बोलताना विराट म्हणाला की, “कोविड-१९मुळे लोकांना बऱ्याच गोष्टींची जाणीव झाली आहे. मलाही एका गोष्टीची जाणीव झाली आहे. ती म्हणजे, सामन्यादरम्यान विनाकारण स्लेजिंग करणे. या गोष्टीमुळे दोन विरोधी संघांमध्ये तणावाचे वातावरण निर्माण होते. त्यामुळे स्लेजिंग ही गोष्टच पूर्णपणे व्यर्थ आहे.”
तसेच पुढे बोलताना विराट म्हणाला की, “जर सामन्यादरम्यान कोण आक्रमक होत असेल, तर त्याने वैयक्तिक होण्याची गरज नाही. सर्वांनी अधिकाधिक सकारात्मक राहण्याचा प्रयत्न करावा. मला विश्वास आहे की, पूर्वीप्रमाणे गोष्टी जास्त वैयक्तिक होणार नाहीत. कारण आम्हा सर्वांना इथे येण्यामागच्या मोठ्या उद्देशाची जाणीव आहे.”
पण ऑस्ट्रेलिया कसोटी संघाचा कर्णधार टीम पेनचे स्लेजिंगविषयी वेगळे मत आहे. तो म्हणाला की, “खेळाडूंनी सामन्यादरम्यान अधिक आक्रमक होणे चांगली गोष्ट नाही. पण गरज पडल्यास आक्रमकता दाखवण्यापासून आम्ही मागे हटणार नाही. आपण निश्चित करु शकत नाही की, यावेळी आक्रमक व्हायला हवे आणि यावेळी नाही. आम्ही मैदानावर उतरल्यानंतर योजनेनुसार खेळण्याचा प्रयत्न करू. पण जर विरुद्ध संघ मैदानावर आक्रमक गोष्टी करताना दिसला, तर आम्हीही मागे हटणार नाही.”
महत्त्वाच्या बातम्या-
…म्हणून गिल नाही, तर शॉची केली प्लेईंग इलेव्हनमध्ये निवड; कर्णधार कोहलीने सांगितले कारण
विक्रमवीर विराट! पहिल्या कसोटीत तेंडुलकर व लाराचे ‘हे’ २ विक्रम करू शकतो आपल्या नावावर
भारत- ऑस्ट्रेलिया संघातील पहिल्या कसोटी सामन्याबद्दल सर्वकाही; वाचा