आयपीएल 2019 स्पर्धेत आता बाद फेरी जवळ येत असल्याने सर्वच संघामधील चूरसही वाढायला लागली आहे. पण असे असतानाच पुढील महिन्यात होणाऱ्या विश्वचषकाच्या तयारीसाठी आयपीएलच्या प्रत्येक संघातील काही परदेशी खेळाडू आयपीएलचा 12 वा मोसम संपण्यापूर्वीच आपापल्या मायदेशी परतणार आहेत.
यामध्ये इंग्लंडचे खेळाडू सर्वात आधी मायदेशी परतले आहेत. यात जॉनी बेअरस्टो, जोफ्रा आर्चर, बेन स्टोक्स अशा इंग्लिश खेळाडूंचा समावेश आहे. आर्चर आणि स्टोक्स हे राजस्थान रॉयल्सकडून यावर्षी आयपीएलमध्ये खेळले असून त्यांनी कोलकता नाईट रायडर्स विरुद्ध त्याच्या आयपीएल 2019मधील शेवटचा सामना खेळला आहे.
या सामन्यानंतर इंग्लंडला रवाना होण्यापूर्वी बेन स्टोक्सने भावनिक भाषण करत संघसहकाऱ्यांचा निरोप घेतला आहे. स्टोक्सच्या या भाषणाचा व्हिडिओ राजस्थान रॉयल्सने सोशल मीडियावर शेअर केला आहे. हा व्हिडिओ शेअर करताना त्यांनी स्टोक्सला शुभेच्छा दिल्या आहेत.
स्टोक्स भाषणादरम्यान संघसहकाऱ्यांसमोर बोलताना म्हणाला, ‘मी जगातील अनेक संघांकडून खेळलो आहे. पण इंग्लंड आणि डरहम हे संघ माझ्या अत्यंत जवळचे आहेत. पण आता राजस्थान रॉयल्स हा देखील माझ्या जवळचा असणारा तिसरा संघ झाला आहे.’
"After the England team and Durham, Rajasthan Royals is a team I hold dear to my heart." 💗@benstokes38 signed off with an emotional speech. Best of luck, Ben! 🙌🏾 #HallaBol pic.twitter.com/86VI0XEopN
— Rajasthan Royals (@rajasthanroyals) April 26, 2019
स्टोक्ससाठी 2019 चा आयपीएल मोसम खास ठरलेला नाही. त्याला या मोसमात 20.50 च्या सरासरीने 123 धावाच करता आल्या. त्याचबरोबर त्याला फक्त 6 विकेट्स घेण्यात यश मिळाले. पण जोफ्रा आर्चरसाठी मात्र आयपीएल 2019 चा मोसम चांगला ठरला आहे. त्याने 11 सामन्यात 11 विकेट्स घेतल्या आहेत.
स्टोक्सचा 2019 विश्वचषकासाठी इंग्लंडच्या प्राथमिक 15 जणांच्या संघात समावेश करण्यात आला आहे. तसेच त्याचा विश्वचषकाआधी पाकिस्तान विरुद्ध होणाऱ्या वनडे मालिकेसाठीही 17 जणांच्या इंग्लंड संघात संधी मिळाली आहे.
त्याचबरोबर जोफ्रा आर्चरला जरी विश्वचषकासाठी इंग्लंडच्या प्राथमिक 15 जणांच्या संघात संधी मिळाली नसली तरी पाकिस्तान विरुद्ध होणाऱ्या वनडे मालिकेसाठी 17 जणांच्या इंग्लंड संघात त्याचा समावेश करण्यात आला आहे. त्यामुळे या मालिकेत चांगली कामगिरी करुन तो विश्वचषकासाठी इंग्लंडच्या अंतिम संघात स्थान मिळवू शकतो.
महत्त्वाच्या बातम्या –
–२०१९ विश्वचषकासाठी १६ पंचांची आयसीसीने केली घोषणा, फक्त एका भारतीय पंचाचा समावेश
–या चार क्रिकेटपटूंची बीसीसीआयने केली अर्जून पुरस्करासाठी शिफारस
–पुरुषांच्या वनडे सामन्यात अंपायरिंग करणारी ती बनली पहिला महिला…