कोणत्याही क्रिकेट सामन्यात फलंदाज, गोलंदाज, यष्टीरक्षक, पंच अन् समालोचक यांच्याबरोबर प्रेक्षकही तितकेच महत्त्वाचे असतात. क्रिकेटपटू किंवा संघाच्या चांगल्या कामगिरीनंतर प्रेक्षक मोठ्या जल्लोषात आनंद साजरा करतात. मात्र तोच क्रिकेटपटू किंवा संघ फ्लॉप ठरला तर प्रेक्षकही तेवढेच निराश होतात. विश्वचषक २०१९ दरम्यान ऑस्ट्रेलिया विरुद्ध पाकिस्तान संघातील सामन्यावेळी प्रेक्षकांनी स्टेडियम खचाखच भरले होते.
यादरम्यान एका प्रेक्षकाने त्याच्या हावभावांनी सर्वांचेच लक्ष वेधले होते. आता हाच प्रेक्षक चक्क संग्रहालयात झळकणार आहे. हा प्रेक्षक पाकिस्तान क्रिकेट संघाचा प्रशंसक असून त्याचे नाव सरीम अख्तर असे आहे.
विश्वचषक २०१९ दरम्यान इंग्लंडच्या टॉन्टन काउंटी मैदानावर ऑस्ट्रेलिया विरुद्ध पाकिस्तान यांच्यात झालेला सामना पाहण्यासाठी सरीमने हजेरी लावली होती. मात्र ऑस्ट्रेलियन गोलंदाजांच्या भेदक माऱ्यापुढे पाकिस्तानी फलंदाजांचा टिकाव लागला नाही. आणि पाकिस्तानने ४१ धावांनी तो सामना गमावला होता.
हे पाहून निराश झालेल्या सरीमने लक्षवेधी प्रतिक्रिया दिली होती. त्याने आपल्या कमरेवर दोन्ही हात ठेवले होते आणि त्याचे चेहऱ्यावरचे हावभाव अतिशय हताश झाल्याप्रमाणे होते. याच क्षणी कॅमेरामनने त्याच्याकडे कॅमेरा फिरवला होता. त्यावेळचा त्याचा या मुद्रेतील फोटो सोशल मीडियावर मोठ्या प्रमाणात व्हायरल झाला होता. अगदी आताही बऱ्याचदा त्याच्या या मुद्रेच्या फोटोचा मीम सोशल मीडियावर चर्चेत येत असतो.
https://twitter.com/msarimakhtar/status/1421564903492669440?s=20
आता याच मीमला हाँगकाँगच्या मीम्स संग्रहालयात जागा मिळाली आहे. स्वत: सरीमने यासंदर्भात माहिती दिली आहे. त्याने संग्रहलयातील फोटो शेअर करत, ‘मला हाँगकाँगच्या मीम्स संग्रहालयात जागा मिळाली आहे. याहू,’ असे लिहिले आहे.
https://twitter.com/msarimakhtar/status/1421598905284931590?s=20
सोबतच त्याने संग्रहालयातील आपल्या मीमचा व्हिडिओही पोस्ट केला आहे. या व्हिडिओमध्ये संग्रहालयातील सर्व गोष्टी दाखवल्या आहेत. दरम्यान सरीमच्या मीमचा फोटोही तिथे लावलेला दिसत आहे.
हा मीम व्हायरल झालेल्या सामन्याबद्दल बोलायचे झाले, ऑस्ट्रेलियाने अष्टपैलू कामगिरी करत हा सामना जिंकत होता. सलामीवीर आरोन फिंचने ८२ धावा आणि डेविड वॉर्नरने १०७ धावांची तूफानी खेळी केली होती. त्यांच्या या धावसंख्येच्या जोरावर ऑस्ट्रेलिया संघाने डावाखेर ३०७ धावा फलकावर नोंदवल्या होत्या. पाकिस्तानकडून मोहम्मद आमिरने सर्वाधिक ५ विकेट्स घेतल्या होत्या.
ऑस्ट्रेलियाच्या ३०८ धावांच्या आव्हानाचा पाठलाग करताना इमाम-उल-हकने सर्वाधिक ५३ धावा केल्या होत्या. तसेच मोहम्मद हाफिज (४६ धावा), वहाब रियाज (४५ धावा) आणि कर्णधार सरफराज अहमद (४० धावा) यांनीही महत्त्वपुर्ण योगदान दिले होते. परंतु पाकिस्तानचा पूर्ण संघ केवळ २६६ धावांवर सर्वबाद झाला आणि त्यांनी ४१ धावांनी सामना गमावला.
महत्त्वाच्या बातम्या-
रिषभच्या यशस्वी कारकिर्दीत विराट-रोहितचा राहिलाय महत्त्वाचा वाटा, स्वत: यष्टीरक्षकाचा खुलासा
चहलची पत्नी रंगली ‘बचपन का प्यार’च्या रंगात, व्हायरल गाण्यावर पार्टनरसंगे लगावले ठुमके; बघा व्हिडिओ
आयपीएलप्रेमींसाठी मोठी खुशखबर, उर्वरित हंगामासाठी उपलब्ध राहणार ‘या’ देशाचे खेळाडू
