पुणे। महाराष्ट्र राज्य लॉन टेनिस संघटना(एमएसएलटीए) यांच्या वतीने आयोजित तिसऱ्या टाटा ओपन महाराष्ट्र टेनिस स्पर्धेत अंतिम पात्रता फेरीत इटलीच्या सातव्या मानांकित रॉबर्टो मार्कोरा याने स्लोव्हेनियाच्या दुसऱ्या मानांकित ब्लेझ रोला याचा पराभव करत मुख्य फेरीत प्रवेश केला. याशिवाय झेकियाचा आठव्या मानांकित लुकास रोझोल, सर्बियाच्या चौथ्या मानांकित निकोला मिलोजेव्हिक व पाचव्या मानांकित विक्टर ट्रोकी या खेळाडूंनीदेखील मुख्य फेरीतील आपले स्थान निश्चित केले.
म्हाळुंगे बालेवाडी येथील श्री शिवछत्रपती क्रीडा संकुलातील टेनिस कोर्टवर सुरु असलेल्या या स्पर्धेत चुरशीच्या झालेल्या लढतीत इटलीच्या सातव्या मानांकित रॉबर्टो मार्कोरा याने स्लोव्हेनियाच्या दुसऱ्या मानांकित ब्लेझ रोला याचा 6-4,7-6(4) असा टायब्रेकमध्ये पराभव करत अनपेक्षित निकाल नोंदविला.सामन्यात पहिल्या सेटमध्ये सहाव्या गेमपर्यंत दोन्ही खेळाडूंनी सावध खेळ केला व त्यामुळे 3-3 अशी बरोबरी निर्माण झाली. सातच्या गेममधे रॉबर्टोने वरचढ खेळ करत ब्लेझची सर्व्हिस ब्रेक केली व स्वतःची सर्व्हिस राखत हा सेट 6-4 असा जिंकून आघाडी घेतली. पिछाडीवर असलेल्या ब्लेझने जोरदार खेळ केला. दोन्ही खेळाडूंनी जिगरबाज खेळाचे प्रदर्शन करत आपापल्या सर्व्हिस राखल्या व हा सेट टायब्रेकमध्ये गेला. टायब्रेकमध्ये मात्र, 30 वर्षीय रॉबर्टोने ब्लेझला फार काही संधी दिली नाही व आपले वर्चस्व कायम राखत टायब्रेक 7-6(4) असा जिंकून विजय मिळवत मुख्य फेरीत धडक मारली.
झेकियाच्या आठव्या मानांकित लुकास रोझोल याने ऑस्ट्रेलियाच्या बिगर मानांकित मॅथ्यू एबडन याचा 6-2, 7-5 असा पराभव करत मुख्य फेरी गाठली. सर्बियाच्या चौथ्या मानांकित निकोला मिलोजेव्हिक याने नेदरलँड्सच्या सहाव्या मानांकित रॉबिन हासे याचा 6-3,6-3 असा तर पाचव्या मानांकित विक्टर ट्रोकी याने रशियाच्या बिगर मानांकित इव्हगेनी कार्लोव्हस्की याचा 6-2, 6-4 असा सरळ सेटमध्ये पराभव करत मुख्य फेरीत धडक मारली.
स्पर्धेच्या मुख्य फेरीच्या लढतींना आज(दि. 3फेब्रुवारी) रोजी सुरुवात होणार आहे. पहिल्या फेरीत एकेरीमध्ये भारताच्या रामकुमार रामनाथचा सामना इटलीच्या सातव्या मानांकित साल्वाटोर कारुसो याच्याशी होणार असून, प्रजनेश गुंनेश्वरचा सामान जर्मनीच्या यानिक मडेन याच्याशी होणार आहे. शशिकुमार मुकुंदचा सामना जपानच्या तारो डॅनियल याच्याशी तर अर्जुन कढेचा सामना झेकियाच्या जिरी वेस्ली याच्याशी होणार आहे.
स्पर्धेचा सविस्तर निकाल- अंतिम पात्रता फेरी
रॉबर्टो मार्कोरा (इटली)(7) वि वि ब्लेझ रोला (स्लोव्हेनिया)(2)6-4,7-6(4)
लुकास रोझोल (झेकिया)(8) वि वि मॅथ्यू एबडन (ऑस्ट्रेलिया) 6-2, 7-5
निकोला मिलोजेव्हिक (सर्बिया)(4) वि वि रॉबिन हासे (नेदरलँड्स)(6) 6-3,6-3
विक्टर ट्रोकी (सर्बिया)(5) वि वि इव्हगेनी कार्लोव्हस्की (रशिया) 6-2, 6-4