पुणे। पूना क्लबच्या वतीने पूना क्लब प्रीमियर लीग क्रिकेट स्पर्धेचे आयोजन करण्यात आले आहे. ही स्पर्धा पूना क्लब येथे दिनांक १० ते १६ फेब्रुवारी दरम्यान होणार आहे. जेट सिंथेसिस, मदर्स रेसिपी आणि जितेंद्र घडोक ग्रुप हे स्पर्धेचे मुख्य प्रायोजक आहेत. आॅक्सफर्ड १ अर्थ आणि कुदो इंडिया डीटीपीएल हे स्पर्धेचे सहप्रायोजक आहेत. तर, कारा इंटलेक्ट यांनी स्पर्धेचे व्यवस्थापन केले आहे, अशी माहिती पूना क्लबचे अध्यक्ष राहुल ढोले पाटील यांनी पत्रकार परिषदेत दिली.
पत्रकार परिषदेला जेट सिंथेसिसचे अध्यक्ष राकेश नवाणी, पूना क्लबचे उपाध्यक्ष नितीन देसाई, स्पोर्टस चेअरमन शशांक हळबे उपस्थित होते. स्पर्धेचे यंदा ७ वे वर्ष आहे. क्लबमधील खेळाडूंना प्रोत्साहन देण्यासाठी ही स्पर्धा आयोजित केली जाते. स्पर्धेचे उद्घाटन सोमवार, दिनांक १० फेब्रुवारी रोजी दुपारी ३.३० वाजता होणार आहे.
राहुल ढोले पाटील म्हणाले, स्पर्धेत सहभागी खेळाडूंची लिलावाद्वारे विभागणी करण्यात आली आहे. ११ वर्षाचा यान खान हा सर्वात लहान खेळाडू तसेच ७४ वर्षाचे किरण मल्होत्रा सर्वात ज्येष्ठ खेळाडू स्पर्धेत सहभागी होणार आहेत. वरुण श्रीवास्तव या खेळाडूला लिलावात टायफून्स संघाने ७ हजार ६०० रुपये (पॉईंट) अशी सर्वाधिक बोली लावून संघात घेतले. तर, तुषार असवाणी या खेळाडूला लायन्स संघाने ६ हजार ८०० रुपये (पॉईंट) तसेच प्रीतम लुणावत या खेळाडूला मॉव्हरिक्स संघाने ६ हजार ६०० रुपये (पॉईंट) अशी बोली लावून संघात घेतले.
शशांक हळबे म्हणाले, प्रत्येक संघात १२ खेळाडू असणार आहेत. ही स्पर्धा साखळी आणि बाद फेरी स्वरुपात होणार आहे. प्रत्येक सामना ६ षटकांचा असणार आहे. स्पर्धेत बारा संघ सहभागी होणार असून, या संघांची दोन गटांत विभागणी करण्यात आली आहे. या दोन गटांतून चार संघ उपांत्य फेरीत दाखल होतील आणि त्यानंतर अंतिम सामना १६ फेब्रुवारीला खेळला जाणार आहे. स्पर्धेतील विजेत्या संघाला ट्रॉफी देऊन गौरविण्यात येणार आहे. त्याचबरोबर स्पर्धेतील सर्वोत्तम खेळाडू, सर्वोत्तम यष्टिरक्षक, सर्वोत्तम फलंदाज, सर्वोत्तम गोलंदाज यांनाही वैयक्तिक पारितोषिके देण्यात येणार आहे. १४ वर्षाखालील मुलांचा तसेच महिलांचा देखील क्रिकेट सामना स्पर्धेदरम्यान होणार आहेत.
संघ आणि संघ मालक :
आॅल स्टार्स – हिरेन परमार,
ईगल्स -अमित लुंकड,
जॅग्वार्स – गौरव घडोक,
जेट सिंथेसिस – राकेश नवानी,
लायन्स – अमर सेहेम्बे,
मॉव्हरिक्स – ललित सोलंकी,
मेहता सेलर्स- सुमीरन मेहता,
टायगर्स- आदर्श हेगडे,
टायफून्स- मनीष जैन,
वॉरियर्स -आरव विज,
व्हेव्ज – रक्षय ठक्कर.
कूडो किंग्ज – सचिन राठी