पुणे । अॅटॉस सिंटेल आणि सिमन्स यांच्यात प्रथम स्पोर्ट्स आयोजित पुणे आयटी कप टी-२० क्रिकेट स्पर्धेची अंतिम लढत रंगणार आहे.
पिंपरी चिंचवड येथील टेल्को मैदानावर झालेल्या पहिल्या उपांत्य लढतीत सिमन्स संघाने सायबेज संघावर सहा धावांनी मात केली. सायबेज संघाने अचूक मारा करून सिमन्स संघाचा डाव १९.२ षटकांत १३० धावांत रोखला होता. यात सिमन्सकडून सौरभ देवरेने ३० चेंडूंत सर्वाधिक ४६ धावांची खेळी केली.
लक्ष्याचा पाठलाग करताना सायबेज संघाला ७ बाद १२४ धावाच करता आल्या. यात संकेत ऐकलची ४४ चेंडूंत नाबाद ५९ धावांची खेळी व्यर्थ ठरली.
यानंतर झालेल्या दुस-या उपांत्य लढतीत अटॉस सिंटेल संघाने टिएटो संघावर १२१ धावांनी दणदणीत विजय मिळवला. यात अटॉस सिंटेल संघाने प्रथम फलंदाजी करताना २ बाद १९० धावांपर्यंत मजल मारली. यात चिन्मय एम.ने ४० चेंडूंत ९ चौकार व १ षटकारसह ६२, तर जय मेहताने ४८ चेंडूंत नाबाद ५९ धावांची खेळी केली.
यानंतर हर्षद तिडकेने ३१ चेंडूंत ७ चौकार व २ षटकारांसह ५५ धावा जोडून अटॉस सिंटेल संघाला १९० धावांपर्यंत पोहोचविले. लक्ष्याचा पाठलाग करताना टिएटोचा डाव ११.१ षटकांत ६९ धावांतच गारद झाला. यात शुभम पाटीलने चार बळी मिळवले.
संक्षिप्त धावफलक –
१) सिमन्स – १९.२ षटकांत सर्व बाद १३० (सौरभ देवरे ४६, सौम्या मोहंती ३१, अभिषेक गोसावी ३-१९, सौरभ रावळ २-१६, कुणाल रावळ २-१४, राकेश शिंदे २-२५) वि. वि. सायबेज- २० षटकांत ७ बाद १२४ (संकेत ऐकल नाबाद ५९, अविनाश माळी १५, निखिल पाटील २-१७, सौरभ देवरे १-२२, नमन शर्मा १-२४). सामनावीर-सौरभ देवरे
२) अटॉससिंटेल – २० षटकांत २ बाद १९० (चिन्मय एम. ६२, जय मेहता नाबाद ५९, हर्षद तिडके ५५, पुष्पेंद्र सिंग १-३१) वि. वि. टिएटो – ११.१ षटकांत सर्व बाद ६९ (अभिषेक कौशिक २२, प्रशांत दुधाणे १६, शुभम पाटील ४-३२, ओंकार तंदुलवाडकर ३-९, जय मेहता २-९). सामनावीर – जय मेहता