गेल्या १० वर्षांत पहिल्यांदाच टीम इंडियाविरुद्ध बांगलादेशने केली ‘ही’ गोष्ट

दिल्ली। भारत विरुद्ध बांगलादेश संघात रविवारी(3 नोव्हेंबर) पहिला टी20 सामना पार पडला. दिल्लीतील अरुण जेटली स्टेडियमवर पार पडलेल्या या सामन्यात बांगलादेशने 7 विकेट्सने विजय मिळवला.

हा विजय बांगलादेशसाठी खास ठरला आहे. त्यांनी आंतरराष्ट्रीय टी20मध्ये भारताविरुद्ध पहिल्यांदाच विजय मिळवला आहे.

या सामन्याआधी भारत-बांगलादेशमध्ये 8 टी20 सामने झाले होते. या आठही सामन्यात भारताने विजय मिळवला होता. परंतू रविवारी बांगलादेशने भारताविरुद्ध 9 वा टी20 सामना खेळताना पहिल्या विजयाची नोंद केली आहे.

भारत विरुद्ध बांगलादेश संघात सर्वात पहिला टी20 सामना 6 जून 2009 ला झाला होता. तेव्हा पासून आत्तापर्यंत या दोन संघांनी एकमेकांविरुद्ध 9 सामने खेळले आहेत.

या विजयाबरोबरच बांगलादेशने भारताविरुद्धच्या तीन टी20 सामन्यांच्या मालिकेत 1-0 ने आघाडी घेतली आहे. आता पुढील टी20 सामना 7 नोव्हेंबरला राजकोट येथे होणार आहे.

दिल्ली टी20 ला होते ऐतिहासिक महत्त्व-

भारत-बांगलादेश संघात दिल्लीमध्ये रविवारी पार पडलेला टी20 सामना हा आंतरराष्ट्रीय टी20 क्रिकेट इतिहासातील 1000 वा सामना होता.