ऑगस्ट महिन्यातील पहिला रविवार हा जगभरात मैत्री दिवस म्हणून साजरा केला जातो. या दिवसाच्या निमित्ताने अनेकजण आपल्या मित्र-मैत्रीणींसाठी काही तरी खास करण्याचा प्रयत्न करतात. अनेक जण जुन्या आठवणींनाही उजाळा देतात. भारताचा माजी अष्टपैलू क्रिकेटपटू युवराज सिंगनेही आज (१ ऑगस्ट) मैत्री दिवसानिमित्त एक खास व्हिडिओ शेअर केला आहे, ज्याची सध्या जोरदार चर्चा आहे.
युवराजने मैत्री दिवसानिमित्त शेअर केला व्हिडिओ
भारतीय क्रिकेटमध्ये युवराजचे स्थान खूप महत्त्वाचे आहे. भारताला २००७ चा टी२० विश्वचषक आणि २०११ चा वनडे विश्वचषक जिंकून देण्यात युवराजने मोलाचा वाटा उचलला आहे. तो जेवढे वर्षे भारतीय संघाकडून खेळला, त्या कालावधीत त्याची अनेक खेळाडूंशी चांगली मैत्री झाली. तसेच आयपीएलमुळे त्याची ख्रिस गेलसारख्या परदेशी खेळाडूंशीही गट्टी जमली. याच मैत्रीची झलक दाखवणारा एक खास व्हिडिओ युवराजने सोशल मीडियावर शेअर केला आहे.
या व्हिडिओच्या बॅकग्राउंडला ‘ये दोस्ती हम नहीं तोड़ेंगे’ हे प्रसिद्ध हिंदी गाणे वाजत आहे. या व्हिडिओच्या सुरुवातीला लिहिलेले दिसते की ‘काही मित्र असतात, आपले कुटुंबही असते. पण काही मित्र असे असतात, जे आपले कुटुंब बनतात.’ तसेच या व्हिडिओला युवराजने कॅप्शन दिले आहे की ‘आयुष्यभराची मैत्री’.
धोनी, विराटला नाही व्हिडिओमध्ये स्थान
युवराजने शेअर केलेल्या व्हिडिओमध्ये त्याचे संघसहकारी राहिलेल्या हरभजन सिंग, सचिन तेंडुलकर, सौरव गांगुली, मोहम्मद कैफ, गौतम गंभीर, आशिष नेहरा, विरेंद्र सेहवाग, झहीर खान, अनिल कुंबळे, राहुल द्रविड, व्हीव्हीएस लक्ष्मण, रोहित शर्मा, ख्रिस गेल, शिखर धवन अशा अनेक खेळाडूंबरोबरच्या काही क्षणांची झलक दिसते.
मात्र, या संपूर्ण व्हिडिओमध्ये कुठेही भारताचा माजी कर्णधार एमएस धोनी दिसत नाही. तसेच सध्याचा भारताचा कर्णधार विराट कोहलीही या व्हिडिओमध्ये दिसत नाही. त्यामुळे अनेकांनी आश्चर्य व्यक्त केले आहे. खरंतर युवराज आणि धोनी यांची जोडी भारतीय संघात एकत्र असताना चांगली प्रसिद्ध होती. अनेकदा त्यांच्यातील मैत्री विविध घटनांमधून दिसूनही आली आहे. पण असे असतानाही युवराजने त्याच्या व्हिडिओमध्ये धोनीला स्थान न दिल्याने अनेकांच्या भुवया उंचावल्या आहेत.
To a lifetime of friendship ❤️🤗 #HappyFriendshipDay pic.twitter.com/apGx5sL2iN
— Yuvraj Singh (@YUVSTRONG12) August 1, 2021
युवी-धोनीच्या मैत्रीला तडा?
खरंतर काही वर्षांपूर्वी युवराज आणि धोनी यांची मैत्री एक उदाहरण म्हणून दिली जात असे. मात्र, युवराजने कर्करोगातून बरे झाल्यानंतर क्रिकेटमध्ये पुनरागमन केल्यावर त्याला हवी तशी संधी भारतीय संघात मिळाली नाही. युवराजने जेव्हा पुनरागमन केले तेव्हा सुरुवातीला एमएस धोनी भारतीय संघाचा कर्णधार होता, तसेच नंतर विराट कोहलीकडे भारताच्या नेतृत्वाची धूरा सोपवण्यात आली. पण धोनी किंवा विराट या दोघांच्याही नेतृत्वाखाली युवराजला फारशी संधी मिळाली नाही.
याच कारणामुळे युवराज आणि धोनीच्या, तसेच विराटबरोबरच्या मैत्रीला तडा गेल्याची चर्चा आहे. त्यातच युवराजने शेअर केलेल्या व्हिडिओने या चर्चेला आणखी उधाण आले आहे. मात्र, याबद्दल धोनी किंवा युवराजकडून कोणतेही भाष्य करण्यात आलेले नाही. पण युवराजचे वडील योगराज सिंग यांनी मात्र यापूर्वी अनेकदा युवराजवर अन्याय केल्याचा आरोप धोनीवर लावला आहे.
महत्त्वाच्या बातम्या –
पाकिस्तानच्या पराभवानंतर खूप व्हायरल झाले होते ‘त्या’ चाहत्याचे मीम, आता म्यूझीयममध्ये मिळाली जागा
ऑस्ट्रेलियासाठी १२५ सामने खेळणारा ‘हा’ खेळाडू आता निवडणार टी२० विश्वचषकासाठी संघ
Tokyo Olympic: ‘तब्बल ११ टाके पडूनही शौर्याने लढला,’ बॉक्सर सतीशच्या पराभवानंतर वडिलांची प्रतिक्रिया
