पुणे। एवाय’एस सॉफ्टबॉल अकादमीच्या वतीने सॉफ्टबॉल लीग स्पर्धेचे आयोजन २० ते २२ डिसेंबर दरम्यान स. प. महाविद्यालायाच्या मैदानावर करण्यात आले आहे. स्पर्धेचे हे १२ वे वर्ष असून सॉफ्टबॉल खेळाच्या प्राचारासाठी या स्पर्धेचे आयोजन करण्यात आले आहे. स्पर्धेतील लढती सकाळी ९ वाजल्यापासून सुरु होतील अशी माहिती एएवाय’एस सॉफ्टबॉल अकादमीचे सचिव राजेंद्र मिसाळ यांनी दिली.
स्पर्धा साखळी व नॉक-आउट या प्रकारात घेतली जाणार असून या स्पर्धेमध्ये १२ संघ खेळणार आहेत. यात दिल्ली, बंगळूर, छत्तीसगड, चंडीगड, मध्यप्रदेश, जळगांव, पुणे नागपूर, नाशिक, मुंबई येथील सुमारे १८० खेळाडू सहभागी होणार आहेत. हे खेळाडू पंडित जावडेकर, मोहोर, सार्थक कॉर्पोरेशन, रचना लाईफस्टाईल, अॅमनोरा (सिटी ग्रुप), कुमार प्रॉपरटीज, मुकुल माधव फाउंडेशन, बँक ऑफ महाराष्ट्र, युवराज ढमाले कॉर्पोरेशन, एस. के. डेव्हलपर्स, सिद्धिविनायक ग्रुप व क्राटोस टॉवर या संघांचे प्रतिनिधित्व करणार आहेत.
स्पर्धेचे उदघाटन पुण्याचे महापौर मा. मुरलीधर मोहोळ यांच्या हस्ते करण्यात येणार असून यावेळी जीएसटीचे उपायुक्त प्रदीप रणपिसे, आयकर विभागाचे उपायुक्त एम. के. वर्मा, जीएसटीचे सहाय्यक आयुक्त अविनाश चव्हाण आदी मान्यवर उपस्थित राहणार आहेत.
यावेळी सॉफ्टबॉल खेळाला व्यासपीठ मिळवून देणारे प्रदीप तळवलकर व सुरेश शहा यांना जीवनगौरव पुरस्काराने सन्मानित करण्यात येणार, अशी माहिती सचिव राजेंद्र मिसाळ यांनी दिली.