५ नाॅन स्ट्राईकर्स, ज्यांनी दुसऱ्या बाजूला उभं राहुन इतिहास घडताना पाहिला आहे

जेव्हा आपण एखादा क्रिकेटचा सामना पाहण्यासाठी स्टेडियमला जातो आणि त्याच सामन्यात एखादा फलंदाज एका नंतर एक शॉट मारतो. त्याच्या दमदार फटकेबाजीच्या जोरावर तो अर्धशतकी, शतकी खेळी करतो. हे सर्व पाहून, आपण त्या ऐतिहासिक क्षणाचे साक्षीदार होतो, म्हणून आपण स्वत:ला नशिबवानही समजतो.

पण, त्या ऐतिहासिक क्षणाचा खरा दावेदार कोण असतो तर, तो म्हणजे नॉन स्ट्रायकिंग फलंदाज. त्याला फक्त फलंदाजाला दमदार खेळी करताना जवळून पाहण्याची संधी मिळत नाही. तर, तो त्या क्षणाचा साक्षीदारही ठरतो.

जाणून घेऊया अशाच काही नॉन स्ट्रायकिंग फलंदाजांविषयी, ज्यांनी दुसऱ्या बाजूला उभा राहून इतिहास घडताना पाहिला आहे. 5 non strikers who witnessed their partners historical cricket feats.

रिडले जॅकोब्स – ब्रायन लारा (४०० धावा) :

वेस्ट इंडिजचा माजी दिग्गज फलंदाज ब्रायन लाराने अँटिगुआच्या सेंट जॉन्स मैदानावर १९९४ साली ३७५ धावांची खेळी करत, सर गॅरी सोबर्स यांचा ३६ वर्षांपुर्वीचा ३६५ धावांचा विक्रम मोडला होता. त्याचा कसोटीतील सर्वाधिक वैयक्तिक धावा करण्याचा विक्रम मोडणे जवळपास सर्वच क्रिकेटपटूंना अशक्य होते. पण, ऑस्ट्रेलियाचा फलंदाज मेथ्यू हेडनने ऑक्टोबर २००३ला झिम्बॉब्वेविरुद्धच्या कसोटीत ३८० धावा करत त्याचा विक्रम मोडून काढला होता.

पण, त्यानंतर ६ महिन्याच्या आत म्हणजेच एप्रिल २००४ला लाराने त्याच मैदानावर जिथे त्याने ३७५ धावांची खेळी केली होती, तिथे ४०० धावांचा विक्रम नोंदवला. इंग्लंडविरुद्धच्या चौथ्या कसोटी सामन्यात लाराने ५८२ चेंडूत कसोटीत वैयक्तिक सर्वाधिक ४०० धावा करण्याचा विक्रम केला होता. जेव्हा लारा त्याची विक्रमी खेळी खेळत होता, तेव्हा त्याच्यासोबत रिडले जॅकोब्स फलंदाजी करत होता.

जॅकोब्सने त्यावेळी १०७ धावांची खेळी केली होती. वेस्ट इंडिजचा तो कसोटी सामना अनिर्णित राहिला होता.

एमएस धोनी – युवराज सिंग (सलग ६ षटकार) आणि सचिन तेंडुलकर (द्विशतक) :

२००७सालच्या टी२० विश्वचषकात भारताचा माजी अष्टपैलू क्रिकेटपटू युवराज सिंगने एक नाही तर दोन विक्रमांची नोंद केली होती. इंग्लंडचा गोलंदाज स्टुअर्ट ब्रॉडच्या षटकात युवराजने ६ चेंडूत सलग ६ षटकार मारले होते.

एवढेच नाही तर, पुढे फलंदाजी करताना त्याने फक्त १२ चेंडूत आपले अर्धशतकही पूर्ण केले होते. त्याचा हा विक्रम आंतरराष्ट्रीय क्रिकेटमध्ये आजही अबाधित आहे. विशेष म्हणजे, युवराजच्या या विक्रमांची नोंद होत असताना, त्याच्यासोबत दुसऱ्या बाजूला भारताचा माजी कर्णधार एमएस धोनी फलंदाजी करत होता.

धोनी फक्त युवराजच्या विक्रमांचा साक्षीदार नव्हता, तर मास्टर ब्लास्टर सचिन तेंडुलकरने त्याचे पहिले द्विशतक करतानाही धोनी मैदानावर उपस्थित होता. २०१०मध्ये ग्वालियरमधील दक्षिण आफ्रिकेविरुद्धच्या दुसऱ्या वनडे सामन्यात सचिनने १४७ चेंडूत २०० धावा करत इतिहास रचला होता.

क्रिस केर्न्स – नॅथन ऍस्टल (सर्वात जलद द्विशतक) :

कसोटी क्रिकेटच्या इतिहासात असे खूप कमी वेळा असे झाले आहे की, कोणत्या गोलंदाजाने १५० चेंडूत २०० धावा केल्या आहेत. २००२ला क्राइस्टचर्च येथे इंग्लंडविरुद्धच्या कसोटीत न्यूझीलंडचा फलंदाज नॅथन ऍस्टलने हा विक्रम केला होता. १५३ चेंडूत त्याने कसोटीतील सर्वात जलद द्विशतक केले होते.

नॅथनच्या या विक्रमाचा क्रिस केर्न्स हा साक्षीदार होता. पहिल्या कसोटी सामन्यातील चौथ्या डावात 28 चौकार आणि ११ षटकारांसह, १६८ चेंडूत २२२ धावा करूनही न्यूझीलंड तो सामना पराभूत झाला होता. ९८ धावांनी सामना गमावल्याने नॅथन खूप नाराज झाला होता. पण, त्याची खेळी मात्र अविस्मरणीय ठरली.

हाशिम अमला – एबी डिविलियर्स (सर्वात जलद शतक) :

वनडेच्या एका सामन्यात एका संघातील ३ फलंदाजांच्या शतकी खेळी, असा कारनामा क्वचितच पाहायला मिळाला असेल. जानेवारी २०१५मध्ये जोहान्सबर्ग येथे दक्षिण आफ्रिकेच्या फलंदाजांनी हा कारनामा केला होता. वेस्ट इंडिजविरुद्धच्या दुसऱ्या वनडे सामन्यात हाशिम अमला (१५३), रिले रोसो (१२८) आणि एबी डिविलियर्स (१४९) यांनी शतके ठोकली होती.

यापैकी सर्वात जलद शतक मात्र डिविलिअर्सने केले होते. ३१ चेंडूत शतकी खेळी करत त्याने वनडेत सर्वात जलद शतक मारण्याचा विक्रम केला होता. यासह त्याने कोरी एंडरसनचा ३६ चेंडूत वनडेतील सर्वात वेगवान शतक करण्याचा विक्रम मोडला होता. विशेष म्हणजे, डिविलियर्सच्या या विक्रमाचा आनंद घेण्यासाठी हाशिम अमला मैदानावर उपस्थित होता. आपले शतक पूर्ण करत तो डिविलिअर्स सोबतही भागिदारी करत होता.

सुरेश रैना – सचिन तेंडुलकर (१००वे शतक) :

मास्टर ब्लास्टर सचिन तेंडुलकरने त्याच्या क्रिकेट कारकिर्दीत अनेक विक्रमांची नोंद केली होती. यात त्याच्या आंतरराष्ट्रीय क्रिकेटमधील १०० शतकांचाही समावेश होता. २०१२सालच्या आशिया चषकात बांग्लादेशविरुद्ध सचिनने त्याचे १००वे शतक ठोकले होते. हे त्याचे वनडेतील ४९वे शतक होते.

कसोटीतील ५१ शतके आणि वनडेतील ४९ शतके असे मिळून सचिनचे आंतरराष्ट्रीय क्रिकेटमधील १०० शतके पूर्ण झाली होती. सचिनच्या या विक्रमाची नोंद होत असताना सुरेश रैना नॉन स्ट्रायकिंग बाजूला उभा होता. दुर्देवाने सचिनला त्याच्या १००व्या शतकानंतर टीकांना सामोरे जावे लागले होते. कारण, त्याने १३८ चेंडूत ते शतक पूर्ण केले होते. त्यामुळे भारताने बांग्लादेशविरुद्धचा तो वनडे सामना गमावला होता.

ट्रेंडिंग घडामोडी-

वनडे क्रिकेटमधील ५ सुपर हिरो, जे टी२०मध्ये ठरले झिरो

जेव्हा राहुल द्रविडच्या घरात शिरली होती अनोळखी मुलगी, घराच्या बाहेर…

इंटरनॅशनल क्रिकेट न खेळताही खेळाडू कशी करतात कमाई?