शतक झळकावल्यानंतर ऍलिस्टर कूकने गोलंदाजीतून वेधले सर्वांचे लक्ष; विचित्र रन- अपचा व्हिडिओ व्हायरल

इंग्लंड क्रिकेट संघाचा माजी क्रिकेट कर्णधार ऍलिस्टर कूक सध्या काऊंटी चॅम्पियनशिपमध्ये खेळताना दिसत आहे. पहिल्या गटात एसेक्स संघाकडून हंगामातील पहिलाच सामना खेळताना त्याने शानदार शतकही झळकावले आहे. फलंदाजीत दम दाखवणाऱ्या कूकने यावेळी आपल्या गोलंदाजीतून सर्वांची वाहवा लुटली. त्याने नेमकं असं काय केलंय, ते आपण जाणून घेऊया.

झाले असे की, केंटविरुद्ध खेळल्या जात असलेल्या या सामन्यात ऍलिस्टर कूकने (Alastair Cook) गोलंदाजी तर केलीच, मात्र यादरम्यान त्याने विचित्र प्रकारची ऍक्शन केली. यादरम्यानचा त्याचा व्हिडिओ सोशल मीडियावर जोरदार व्हायरल होत आहे. कूकने या सामन्यात केवळ एक षटक गोलंदाजी केली. यामध्ये त्याने ८ धावा दिल्या. मात्र, या षटकात त्याने केलेली विचित्र रनअप गोलंदाजीने तो सोशल मीडियावर व्हायरल होऊ लागलाय. त्याची ही गोलंदाजीची विचित्र स्टाईल पाहून समालोचकही हैरान झाले.

Sir Alastair Cook, ever the entertainer 😂#LVCountyChamp pic.twitter.com/JRYCeI11oM

— Vitality County Championship (@CountyChamp) April 10, 2022

तत्पूर्वी फलंदाजी करताना सलामीवीर कूकने शानदार शतक साजरे केले. पहिल्या डावात त्याने १०० धावांचे महत्त्वपूर्ण योगदान दिले. या धावा करताना त्याने ११ चौकारही झळकावले होते. दुसऱ्या डावात तो अवघ्या २६ धावांवर नाबाद राहिला. कूकने पहिल्या विकेटसाठी निक ब्राऊनसोबत पहिल्या डावात २२० धावांची भलीमोठी भागीदारीही केली.