कसोटी मालिकेत पाकिस्तानला पराभूत केल्यानंतर इंग्लंडचे आता टी-२० मालिकेवर लक्ष आहे. शुक्रवारपासून दोन्ही देशांमधील ३ सामन्यांच्या टी२० मालिकेला सुरूवात होणार आहे. मालिकेचे सर्व सामने मँचेस्टर येथे अनुक्रमे २८, ३०ऑगस्ट आणि १ सप्टेंबर रोजी होतील. या मालिकेतील पहिला आणि तिसरा सामना भारतीय प्रमाणवेळेनुसार रात्री १०.३० ला सुरु होणार आहेत. तर दुसरा सामना संध्याकाळी ६.४५ ला सुरु होणार आहे.
१५ महिन्यांनंतर दोन्ही संघांमध्ये टी२० सामना होईल. याआधी गेल्यावर्षी मे महिन्यात कार्डिफमध्ये झालेल्या एकमेव टी२० मध्ये इंग्लंडने पाकिस्तानला ७ विकेट्सनी पराभूत केले होते. यावेळी पाकिस्तानकडे ४ वर्षांनंतर इंग्लंडला त्यांच्या मायदेशात टी२० मालिकेत नमविण्याची संधी आहे.
पाकिस्तान संघ ७ महिन्यांनंतर टी२० सामना खेळणार आहे
पाकिस्तान ७, तर इंग्लंडचा संघ ६ महिन्यांनंतर टी२० मालिका खेळत आहे. दोन्ही देशांनी आपली अखेरची टी२० मालिका जिंकली आहे. यावर्षाच्या सुरूवातीला पाकिस्तानने बांगलादेशला २-१ने असे हरवले तर इंग्लंडनेही दक्षिण आफ्रिकेला यावर्षी फेब्रुवारीमध्ये आपल्या मायदेशात पराभूत केले आहे. अशा परिस्थितीत दोन्ही संघांचा मालिका विजयाचा ठाम दावा आहे.
प्रत्येकाचे लक्ष बाबर आझम आणि मॉर्गनवर असेल
टी२० मालिकेत पाकिस्तानी फलंदाज बाबर आझमवर सर्वांचे लक्ष असेल. टी२०मध्ये तो संघाचा कर्णधार तसेच जगातील क्रमांक एकचा फलंदाज आहे. त्याने आतापर्यंत ३८ टी२०मध्ये ५०.७२ च्यासरासरीने १४७१ धावा केल्या आहेत. यावर्षी त्याने बांगलादेशविरुद्ध दोन टी२० सामन्यांत ६६ धावा केल्या आहेत. दुसरीकडे इंग्लंडचा संघ विश्वचषक विजेता कर्णधार इऑन मॉर्गनच्या ताब्यात आहे.
त्याच्या नेतृत्वात इंग्लंडने गेल्या महिन्यात ३ सामन्यांच्या वनडे मालिकेत आयर्लंडला २-१ असे हरवले. या मालिकेत कर्णधार मॉर्गनने इंग्लंडकडून सर्वाधिक १४२ धावा केल्या. यात एका शतकाचाही समावेश आहे.
आमने-सामने –
इंग्लंड आणि पाकिस्तान या दोन्ही देशांमध्ये आतापर्यंत १५ टी२० सामने झाले आहेत. यात पाकिस्तानने ४ आणि इंग्लंडने १० विजय मिळविले आहे, तर एक सामना बरोबरीत सुटला आहे. त्याच बरोबर इंग्लंडमधील पाकिस्तानची आकडेवारीही चांगली नाही. पाकिस्तानने येथे इंग्लंडविरुद्ध ६ टी२० सामने खेळले आहेत. त्यापैकी त्याने केवळ २ जिंकले आहेत, तर ४ पराभवांचा सामना करावा लागला आहे.
पाकिस्तानने ९२ टी२० सामने जिंकले आहेत
दोन्ही देशांच्या एकूण सामन्यांच्या आकडेवारीबद्दल बोलायचे झाल्यास इंग्लंडने आतापर्यंत ११७ टी२० सामने खेळले आहेत. यात त्याने ५८ जिंकले आहेत आणि ५३ गमावले आहेत. तर दोन सामने बरोबरीत राहिले आणि ३ सामन्यांचा निकाल लागलेला नाही. त्याचबरोबर पाकिस्तानने १५२ टी२० सामन्यांपैकी ९२ जिंकले आहेत, तर ५५ मध्ये पराभवाला सामोरे जावे लागले आहे. ३ सामने बरोबरीत होते आणि एक सामन्याचा निकाल लागलेला नाही. या संदर्भात पाकिस्तानने टी२० सामन्यांपैकी ६० टक्के जिंकले आहेत.
दोन्ही देशांमधील शेवटच्या ५ टी२० सामन्यांचा विचार केला तर याबाबतीत इंग्लंडची आकडेवारी चांगली आहे. कारण त्यांनी तीन सामने जिंकले आणि पाकिस्तानने फक्त एक सामना जिंकला. एक सामना बरोबरीत राहिला आहे.
तिन्ही टी -२० सामने मॅंचेस्टरमध्ये होणार आहेत
पाकिस्तान आणि इंग्लंड यांच्यातील आजपासून सुरु होणाऱ्या टी -२० मालिकेतील सर्व सामने मँचेस्टरमध्ये खेळले जातील. फलंदाजीसाठी हे मैदान चांगले आहे. या मैदानावरील आतापर्यंतच्या ८ पैकी ४ सामन्यात दुसऱ्यांदा फलंदाजी करणाऱ्या संघाने विजय मिळवला आहे. तर प्रथम फलंदाजी करणाऱ्या संघाला एकदाच विजय मिळाला आहे. तसेच दोन सामन्यांचा निकाल लागलेला नाही आणि एक सामना रद्द झाला आहे.
या मैदानावरील शेवटचा टी२० सामना दोन वर्षांपूर्वी झाला होता. तेव्हा भारताने यजमान इंग्लंडला पराभूत केले. पाकिस्तान आणि इंग्लंड यांच्यात या मैदानावर फक्त एकच सामना झाला असून त्यामध्ये पाकिस्तानने ९ गडी राखून विजय मिळविला होता.
मँचेस्टरची टी२० आकडेवारी
सर्वोच्च धावसंख्या: १९१/७ (इंग्लंड विरुद्ध न्यूझीलंड, २०१५)
सर्वात कमी धावसंख्या: ४/२ (इंग्लंड विरुद्ध ऑस्ट्रेलिया, २००९) (पावसामुळे सामना ७ चेंडू नंतर रद्द करण्यात आला.)
सर्वोत्तम खेळी: केएल राहुल – १०१ नाबाद
सर्वोत्कृष्ट गोलंदाजी : कुलदीप यादव – ५ विकेट्स
मँचेस्टरमध्ये पावसामुळे अडथळा येऊ शकतो
मँचेस्टरमध्ये पाऊस पडण्याची शक्यता आहे. अशावेळी सामन्यावर परिणाम होऊ शकतो.
टी -२० मालिकेसाठी इंग्लंड-पाकिस्तान संघ
इंग्लंडः इयोन मॉर्गन (कर्णधार), मोईन अली, जॉनी बेअरस्टो, टॉम बेंटन, सॅम बिलिंग्ज, टॉम करन, जो डेन्ले, लुईस ग्रेगोरी, ख्रिस जॉर्डन, साकीब मेहमूद, डेव्हिड मालन, आदिल राशिद, जेसन रॉय आणि डेव्हिड विले.
पाकिस्तानः बाबर आझम (कर्णधार), फखर जमान, हैदर अली, हरीस रऊफ, इफ्तिखार अहमद, इमाद वसीम, खुशदिल शाह, मोहम्मद हफीज, मोहम्मद हसनैन, मोहम्मद रिझवान, मोहम्मद आमिर, नसीमशाह, सरफराज अहमद, शादाब खान, शाहीन शाह आफ्रिदी , शोएब मलिक आणि वहाब रियाज.