भारत आणि पाकिस्तान यांच्यात आशिया कपचा सामना 14 सप्टेंबरला खेळला गेला. या सामन्यापूर्वीच देशभरात बराच गोंधळ माजला होता, पण सामना संपताच पाकिस्तानला मोठा धक्का बसला. भारत-पाकिस्तान सामन्यानंतर टीम इंडियाच्या खेळाडूंनी पाकिस्तानी खेळाडूंशी हस्तांदोलन करण्यास नकार दिला. पण आता हा वाद इतका वाढला आहे की पाकिस्तानच्या संघाने आशिया कपमधून बाहेर पडण्याची धमकी दिली. मात्र पाकिस्तान क्रिकेट बोर्ड स्वतःच्या उभारलेल्या जाळ्यात अडकला आणि उघड्यावर बेइज्जत झाला.
भारत-पाकिस्तान सामन्यात टॉसदरम्यान भारतीय कर्णधार सूर्यकुमार यादव यांनी पाकिस्तानी कर्णधार सलमान अली आगा यांच्याशी हस्तांदोलन केले नव्हते. त्यानंतर सामना संपल्यानंतरही भारतीय संघ पाकिस्तानी खेळाडूंशी हस्तांदोलन करण्यासाठी मैदानात उतरला नाही आणि थेट ड्रेसिंग रूममध्ये जाऊन दरवाजा बंद केला. त्यानंतर सूर्यकुमार यादव म्हणाले होते की, आमच्यासाठी देशाच्या भावना या खेळातील स्पिरिटपेक्षा महत्त्वाच्या आहेत.
भारतातोबत झालेल्या सामन्यानंतर पाकिस्तानी संघाने आयसीसीकडे सामन्याचे रेफरी अँडी पाइक्रॉफ्ट यांच्या विरोधात तक्रार दाखल केली. हेच रेफरी आज, 17 सप्टेंबरला पाकिस्तान आणि यूएई यांच्यातील सामन्यासाठीही नियुक्त होते. याबाबत पाकिस्तान क्रिकेट बोर्डाने स्पष्ट केले की, जर अँडी पाइक्रॉफ्ट यांना रेफरीच्या पदावरून हटवले नाही, तर पाकिस्तानचा संघ यूएईविरुद्धचा सामना खेळणार नाही.
पाकिस्तान आणि यूएईच्या सामन्यापूर्वी तब्बल एक तास प्रचंड गोंधळ माजला. पीसीबीने सुरुवातीला पाकिस्तानी खेळाडूंना स्टेडियममध्ये जाण्यास मनाई केली आणि अशी बातमी समोर आली की पाकिस्तान आशिया कपचा बहिष्कार करू शकतो. त्यानंतर आयसीसी आणि पीसीबी यांच्यात बैठक झाली, ज्यात रेफरी अँडी पाइक्रॉफ्ट निर्दोष असल्याचे सांगण्यात आले आणि त्यांनाच रेफरी म्हणून कायम ठेवण्यात आले.
आयसीसीने आपल्या निर्णयात स्पष्ट केले आहे की अँडी पाइक्रॉफ्ट यांनी कोणत्याही सामन्याच्या प्रोटोकॉलचे उल्लंघन केलेले नाही. यानंतर पीसीबीने पूर्णपणे आपली भूमिका बदलली. आयसीसीचा निर्णय पाकिस्तान क्रिकेट बोर्डाच्या बाजूने आला नाही आणि अखेर पाकिस्तानी संघ खेळण्यासाठी तयार झाला. पाकिस्तानने आधी सामना खेळण्यास नकार दिला होता, पण नंतर होकारही दिला. मात्र या सगळ्या गोंधळामुळे सामन्याचा वेळ तब्बल एका तासाने पुढे ढकलण्यात आला.
