निवडकर्त्यांचा युवकांवर विश्वास, भुवनेश्वरच्या नेतृत्त्वात किती मजबूत आहे भारताचे वेगवान गोलंदाजी आक्रमण?

ऑगस्ट महिन्याअंती भारतीय संघाला संयुक्त अरब अमिरातीत आशिया चषक २०२२ खेळायचा आहे. २७ ऑगस्टपासून सुरू होणाऱ्या या स्पर्धेसाठी सोमवारी (०८ ऑगस्ट) १५ सदस्यीय भारतीय संघाची घोषणा करण्यात आली आहे. या संघात विराट कोहली, केएल राहुल यांसारख्या अनुभवी खेळाडूंचे पुनरागमन झाले आहे. तर गोलंदाजी विभागात युवा खेळाडूंवर विश्वास दाखवला गेला आहे.

टी२० आशिया चषकासाठी (Asia Cup 2022) आवेश खान (Avesh Khan), अर्शदीप सिंग (Asrhdeep Singh), रवि बिश्नोई या युवा चेहऱ्यांना संधी दिली गेली आहे. तर अनुभवी वेगवान गोलंदाज जसप्रीत बुमराह आणि हर्षल पटेल यांना दुखापतीमुळे आशिया चषकात जागा मिळालेली नाही. दरम्यान आशिया चषकासाठी निवडण्यात आलेले वेगवान गोलंदाजी आक्रमण किती मजबूत (Pace Bowling Attack) आहे?, याचा आढावा येथे घेण्यात आला आहे.

भारताचा वरिष्ठ वेगवान गोलंदाज बुमराह (Jasprit Bumrah) पाठीच्या दुखापतीमुळे या स्पर्धेत खेळू शकणार नाही. त्यामुळे आता भुवनेश्वर कुमार (Bhuvneshwar Kumar) आशिया चषकात भारताच्या वेगवान गोलंदाजी विभागाचे नेतृत्त्व करेल. भुवनेश्वर टी२० क्रिकेटमध्ये सातत्याने शानदार प्रदर्शन करत संघाला विजय मिळवून देताना दिसत आहे. त्याने यावर्षी आतापर्यंत भारतीय संघाकडून टी२० १७ सामने खेळले आहेत. ज्यामध्ये त्याने एकूण २० विकेट्स घेतल्या आहेत. यादरम्यान त्याची सरासरी १७.८० इतकी राहिली आहे.

तर युवा वेगवान गोलंदाज आवेश खान, अर्शदीप सिंग यांनीही मागील काही टी२० मालिकांमध्ये आपले नाणे खणखणीत वाजवले आहे. इंग्लंड, आयर्लंड आणि वेस्ट इंडिज दौऱ्यांत त्यांनी किफायतशीर गोलंदाजी केली आहे. आवेशने यावर्षी १३ टी२० सामन्यात ११ विकेट्स घेतल्या आहेत. तर अर्शदीपने ६ सामन्यांमध्ये ९ फलंदाजांना तंबूत धाडले आहे. त्यामुळे भारताचे वेगवान गोलंदाजी आक्रमण मजबूत दिसत आहे.