चेन्नई सुपर किंग्स (CSK) साठी हा आयपीएल हंगाम खूप आव्हानात्मक ठरत आहे. संघाने आतापर्यंत खेळलेल्या 8 सामन्यांपैकी केवळ 3 सामन्यांत विजय मिळवला आहे. खेळाडूंच्या दुखापती ही संघासाठी मोठी डोकेदुखी ठरली असून, अनेक महत्त्वाचे खेळाडू स्पर्धेतून बाहेर पडले आहेत. या पार्श्वभूमीवर, चेन्नईने एक मोठे पाऊल उचलले असून मुंबईच्या आयुष वर्तकला संधी मिळण्याची शक्यता आहे.
रिपोर्ट्सनुसार, 21 वर्षांच्या युवा खेळाडू आयुष वर्तकला चेन्नई सुपर किंग्सने चाचणी (Trials) देण्यासाठी बोलावले आहे. आयुषला मंगळवारी चाचणीसाठी बोलावण्यात आले असून तो सोमवारी रात्रीपर्यंत चेन्नईत दाखल होईल. आयुष एक फलंदाज आणि अष्टपैलू (All-rounder) खेळाडू आहे. जर त्याची चाचणी यशस्वी ठरली, तर तो अधिकृतपणे संघात सामील होऊ शकतो. याआधी आयुष म्हात्रेलाही दुखापतग्रस्त खेळाडूचा बदली खेळाडू म्हणून संघात स्थान मिळाले होते.
आयुष वर्तकने अतिशय कमी वेळात आपल्या कौशल्याने सर्वांचे लक्ष वेधून घेतले आहे. तो मुंबईतील ‘पारसी जिमखाना’ कडून खेळतो. त्याने मुंबईच्या 23 वर्षांखालील (U-23) संघाचे ‘कर्नल सी.के. नायडू ट्रॉफी’मध्ये नेतृत्व केले आहे. त्याच्याकडे मोठे शॉट्स मारण्याची जबरदस्त क्षमता आहे. ‘मेन्स स्टेट ए ट्रॉफी 2025’ मध्ये त्याने 363 धावा केल्या होत्या, ज्यामध्ये 26 षटकारांचा समावेश होता. त्याच्या उत्कृष्ट कामगिरीसाठी त्याला नुकतेच MCA चा ‘U23 आउटस्टँडिंग परफॉर्मन्स अवॉर्ड 2024’ देऊन गौरविण्यात आले होते. जरी आयुष अद्याप मुंबईच्या वरिष्ठ (Senior) संघात सामील झाला नसला, तरी त्याच्यात मोठी कामगिरी करण्याची क्षमता आहे. आता चेन्नईच्या चाचणीत तो कशी कामगिरी करतो, याकडे सर्वांचे लक्ष आहे.
