हम तैयार है..! बीसीसीआयकडून ऑस्ट्रेलिया दौऱ्यापूर्वी भारतीय संघाचे खास फोटो प्रसिद्ध

कोरोनानंतर भारतीय संघ यावर्षी नोव्हेंबरमध्ये ऑस्ट्रेलियाविरुद्ध पहिली आंतरराष्ट्रीय मालिका खेळणार आहे. या दौर्‍यावर दोन्ही देशांमध्ये ३ सामन्यांची टी२० व वनडे मालिका आणि ४ सामन्यांची कसोटी मालिका खेळली जाणार आहे. सध्या संयुक्त अरब अमिरातीत असलेले भारतीय खेळाडू आणि सहयोगी कर्मचारी १३ नोव्हेंबर रोजी ऑस्ट्रेलियाला रवाना होणार आहेत. तत्पूर्वी बीसीसीआयने भारतीय संघाचे खास फोटो सोशल मीडियावर शेअर केले आहेत.

बीसीसीआयने त्यांच्या अधिकृत ट्विटर अकाउंटवर हे फोटो शेअर केले आहेत. या फोटोत सर्व खेळाडू काळ्या रंगाच्या पोशाखात दिसत आहेत. अनेकांनी मास्क घालून फोटो काढले आहेत. खेळाडूंसोबत संघाचे प्रशिक्षक रवी शास्त्रींनीही तो पोशाख परिधान केला आहे. बीसीसीआयने भारतीय संघाचे फोटो शेअर करत त्याला भन्नाट असे कॅप्शनही दिले आहे.

#TeamIndia is BACK!

Let's embrace the new normal ????#AUSvIND pic.twitter.com/csrQ3aVv21

— BCCI (@BCCI) November 11, 2020

असे आहे वेळापत्रक
ऑस्ट्रेलिया दौर्‍यावर भारताला चार कसोटी, तीन वनडे आणि तीन टी२० सामने खेळायचे आहेत. या दौर्‍याची सुरुवात वनडे सामन्याने होईल. हे तीनही वनडे सामने २७ नोव्हेंबर, २९ नोव्हेंबर आणि २ डिसेंबर रोजी खेळले जातील.

त्यानंतर तीन टी२० सामने ४, ६ आणि ८ डिसेंबर रोजी खेळले जातील, तर पहिला कसोटी सामना १७ डिसेंबरपासून सुरू होईल. वेळापत्रकानुसार ऍडलेडमध्ये भारत पहिला दिवस- रात्र कसोटी सामना खेळेल, तर मेलबर्नमध्ये २६ डिसेंबर ते ३० डिसेंबरदरम्यान दोन्ही संघ बॉक्सिंग डे कसोटी सामना खेळतील. १९ जानेवारी रोजी चौथ्या कसोटी सामन्याने हा दौरा संपेल.