लईच वाईट! ‘या’ अंपायरचा झालाय रुडी कर्स्टनपेक्षाही दुर्देवी अंत, चक्क बॉम्बस्फोटात गमावला होता जीव

मंगळवारी (९ ऑगस्ट) क्रिकेटविश्वातून दु:खद बातमी पुढे आली असून क्रिकेटविश्वातील दिग्गज पंचांपैकी एक असलेले दक्षिण आफ्रिकी पंच रूडी कर्स्टन (Rudi Koertzen) यांचा कार अपघातात मृत्यू झाला. ते ७३ वर्षांचे होते. अशाप्रकारे अपघातात मृत्यू आलेले ते पहिलेच पंच नाहीत. त्यांच्यापूर्वीही एका पंचांचा असाच दुर्देवी शेवट झाला होता. त्यांना तर बॉम्बस्फोटमध्ये आपला जीव गमवावा लागला होता. हे पंच होते, अफगाणिस्तानचे दिवंगत पंच बिस्मिल्लाह जन शिनवारी.

अफगाणिस्तानचे माजी आंतरराष्ट्रीय क्रिकेट पंच बिस्मिल्लाह शिनवारी यांचा ३ ऑक्टोबर २०२० रोजी अफगाणिस्तानमधील नंगरहार प्रांतात रस्त्याच्या कडेला झालेल्या बॉम्बस्फोटात जीव गेला होता. त्यावेळी ते केवळ ३६ वर्षांचे होते. नांगरहार प्रांतातील शिनवार जिल्ह्यातील एका रस्त्याच्या कडेला उभ्या असलेल्या कारमध्ये बॉम्ब होता, ज्याचा विस्फोट झाला होता.

अफगाणिस्तानचे तत्कालिन राज्यपाल यांना मारण्याचा हा कट होता. परंतु दुर्देवाने पंच बिस्मिल्लाह शिनवारी (Umpire Bismillah Shinwari) यांचा या बॉम्बस्फोटात मृत्यू झाला होता. त्यांच्याबरोबरच आणखी १५ लोकांचा या बॉम्बस्फोटात मृत्यू झाला होता. तर ३० लोक गंभीर जखमी झाले होते.

बिस्मिल्लाह शिनवारी यांची पंच म्हणून कारकीर्द फार छोटेखानी राहिली होती. त्यांनी ११ आंतरराष्ट्रीय सामन्यांमध्ये पंचगिरी केली होती. यामध्ये ५ वनडे आणि ६ टी२० सामन्यांचा समावेश आहे. त्यांनी ७ डिसेंबर २०१७ ला अफगाणिस्तान विरुद्ध आयर्लंड संघातील वनडे सामन्यातून आंतरराष्ट्रीय क्रिकेटमध्ये पंच म्हणून पदार्पण केले होते. तर २०२० मध्ये आयर्लंडमध्येच अफगाणिस्तानविरुद्ध शेवटच्या आंतरराष्ट्रीय सामन्यात पंचगिरी केली होती.