एंडरसन-तेंडुलकर ट्रॉफीनंतर एकही सामना खेळला गेलेला नाही. त्यामुळेच चाहत्यांना आपल्या स्टार खेळाडूंना पुन्हा मैदानावर पाहण्याची आतुरता लागली आहे. 9 सप्टेंबरपासून आशिया कप 2025 सुरू होणार आहे. तब्बल 1 महिन्याच्या दीर्घ अंतरानंतर टीम इंडिया मैदानात उतरणार आहे. या मोठ्या स्पर्धेआधी रोहित शर्मा, शुबमन गिलसह 7 स्टार खेळाडूंची 30 ऑगस्ट रोजी एनसीए मध्ये चाचणी होणार आहे. या फिटनेस चाचणीत नापास झालेल्या खेळाडूंना मोठा धक्का बसू शकतो.
आशिया कप 2025 पूर्वी एनसीए मध्ये स्टार खेळाडूंची फिटनेस चाचणी होणार आहे. या चाचणीत 30 ऑगस्ट रोजी वनडे कर्णधार रोहित शर्मा, टेस्ट कर्णधार शुबमन गिल, स्टार वेगवान गोलंदाज जसप्रीत बुमराह, मोहम्मद सिराज, वॉशिंग्टन सुंदर, शार्दुल ठाकुर आणि यशस्वी जयस्वाल सहभागी होणार आहेत. या सर्व खेळाडूंना यो-यो टेस्टसोबत ब्रूनो टेस्टही द्यावी लागणार आहे. जे खेळाडू या दोन्ही चाचण्यांत नापास होतील, त्यांच्यासाठी टीम इंडियामध्ये खेळणे फारच कठीण होणार आहे. बीसीसीआय सध्या फिटनेसबाबत खूपच सजग आहे. नवे भारतीय टीम मॅनेजमेंट फिटनेसच्या बाबतीत पूर्वीपेक्षा अधिक गंभीर दिसत आहे.
वनडे कर्णधार रोहित शर्मा, मोहम्मद सिराज, वॉशिंग्टन सुंदर, शार्दुल ठाकुर आणि यशस्वी जयस्वाल हे आशिया कप 2025 च्या संघाचा भाग नाहीत. पण त्यानंतरही या खेळाडूंची फिटनेस चाचणी घेतली जात आहे. रिपोर्ट्सनुसार ऑस्ट्रेलियाविरुद्धच्या वनडे मालिकेत या खेळाडूंना संधी दिली जाऊ शकते. त्यामुळेच मॅनेजमेंट हे खेळाडू आधीपासूनच तयार ठेवू इच्छित आहे. आगामी काळात इतर खेळाडूंनाही फिटनेस चाचणीला सामोरे जावे लागणार आहे.
