५ वेळच्या चॅम्पियन चेन्नई सुपर किंग्स संघाने आयपीएल २०२५ मध्ये अत्यंत निराशाजनक कामगिरी केली होती, ज्यामुळे संघाला मोठ्या टीकेचा सामना करावा लागला होता. आता आयपीएल २०२६ साठी संघ आपली तयारी सुरू करणार आहे. या सीझनच्या लिलावात (Auction) संघाने तरुण भारतीय खेळाडूंवर मोठा डाव लावला आहे. गेल्या अनेक दिवसांपासून प्रतीक्षा करणाऱ्या महेंद्रसिंह धोनीच्या चाहत्यांना आता मोठी आनंदाची बातमी मिळणार आहे. सीएसकेने (CSK) पुनरागमनाचा ‘मास्टरप्लान’ तयार केला आहे.
नवीन मीडिया रिपोर्ट्सनुसार, चेन्नई सुपर किंग्सचा संघ २७ फेब्रुवारीपासून आपल्या आयपीएल २०२६ च्या कॅम्पला सुरुवात करेल. सुरुवातीला संघ १० दिवसांचा कॅम्प ‘सीएसके हाय परफॉर्मन्स सेंटर’ नावालूर येथे आयोजित करणार आहे. त्यानंतर, टी-२० वर्ल्ड कप २०२६ संपल्यानंतर हा कॅम्प चेपॉक स्टेडियमवर हलवला जाईल. विशेष म्हणजे या कॅम्पमध्ये पहिल्या दिवसापासूनच महेंद्रसिंह धोनी सहभागी होणार आहे.
या कॅम्पमध्ये सहभागी होण्यासाठी प्रशांत वीर आधीच चेन्नईत दाखल झाला आहे. त्याच्याव्यतिरिक्त इतरही अनेक तरुण भारतीय खेळाडू या कॅम्पचा भाग असणार आहेत. मात्र, परदेशी खेळाडू पहिल्या दिवसापासून कॅम्पमध्ये उपस्थित राहू शकणार नाहीत. कर्णधार ऋतुराज गायकवाड देखील फेब्रुवारीमध्येच या कॅम्पमध्ये सामील होऊ शकतो. चेन्नई सुपर किंग्सचा संघ या सीझनमध्ये धमाकेदार पुनरागमन करण्यासाठी सज्ज दिसत आहे.
