आयपीएल २०२२ च्या मेगा लिलावापूर्वी चेन्नई सुपर किंग्सने (सीएसके) मोठा निर्णय घेतला आहे. सीएसकेने एमएस धोनीला कायम ठेवण्याचा निर्णय घेतला असून, धोनी पुढील वर्षी सीएसकेकडून खेळणार आहे. धोनीसोबत अष्टपैलू रवींद्र जडेजा आणि सलामीवीर ऋतुराज गायकवाड यांनाही चेन्नई सुपर किंग्सने कायम ठेवण्याचा निर्णय घेतला आहे. त्याचबरोबर आपला सर्वात यशस्वी फलंदाज सुरेश रैनाला चेन्नई सुपर किंग्सने मुक्त केले आहे.
चेन्नई सुपर किंग्सचा रिटेन केलेला चौथा खेळाडू कोण असेल याचा निर्णय अद्याप झालेला नाही. एका वृत्तानुसार, चेन्नई सुपर किंग्स मोईन अलीला कायम ठेवू इच्छित आहे, तो यास सहमत आहे की नाही हे अद्याप ठरलेले नाही. जर मोईन अली सहमत नसेल तर सीएसके सॅम करनला कायम ठेवू शकते. फ्रँचायझींनी त्यांच्या कायम ठेवलेल्या खेळाडूंची यादी ३० नोव्हेंबरपर्यंत सादर करायची आहे. सर्व फ्रँचायझी फक्त चार खेळाडूंना कायम ठेवू शकतात. ज्यामध्ये तीन भारतीय आणि एका विदेशी खेळाडूचा समावेश असेल.
सीएसकेने धोनीला कायम ठेवण्यात आश्चर्य वाटण्यासारखे काही नाही. कारण या खेळाडूच्या जोरावर सीएसकेची ब्रँड व्हॅल्यू खूप जास्त वाढली आहे. खुद्द संघाचे मालक एन श्रीनिवासन यांनीही हे मान्य केले आहे. धोनीने सीएसकेच्या एका कार्यक्रमातही आयपीएल खेळत राहण्याचे संकेत दिले होते. धोनी म्हणाला होता, ‘मी नेहमीच माझ्या क्रिकेटचे नियोजन केले आहे. माझा शेवटचा आंतरराष्ट्रीय टी२० सामना रांची येथे झाला होता. आशा आहे की माझा शेवटचा टी२० सामना चेन्नईत होईल.’ सीएसकेने धोनीला तीन वर्षे कायम ठेवले आहे, म्हणजेच धोनी पुढील वर्षी मैदानात उतरणार आहे. तसे, धोनीचा फिटनेसही चांगला आहे. याबाबतची वृत्ते प्रमुख वृत्तपत्रांनी दिली आहेत.
दिल्ली कॅपिटल्सने आपले चार रिटेन केलेले खेळाडू निश्चित केले आहेत. दिल्लीने कर्णधार ऋषभ पंत, पृथ्वी शॉ, अक्षर पटेल यांना कायम ठेवण्याचा निर्णय घेतला आहे, तर हा संघ परदेशी खेळाडू एन्रिक नॉर्किएला कायम ठेवणार आहे. मोठी बातमी म्हणजे पंजाब किंग्सचा कर्णधार केएल राहुल फ्रँचायझी सोडणार आहे. त्याला लखनौच्या नवीन फ्रँचायझीचा कर्णधार बनवले जाऊ शकते.
