वंदे मातरम् क्रीडा मंडळाने आपल्या “अमृत महोत्सवी ” वर्षानिमित्त आयोजित केलेल्या स्थानिक प्रथम श्रेणी पुरुष गटात दुर्गामाता स्पोर्ट्स क्लब विरुद्ध विजय क्लब हा अंतिम सामना पावसाच्या व्यत्ययामुळे खेळविता आला नाही. शेवटी पाऊस काही थांबण्याची लक्षणे दिसत नसल्यामुळे सामन्याचा निकाल नाणेफेकीवर लावण्यात आला. यात दुर्गामाताने नाणेफेक जिंकत बाजी मारली.
नाणेफेक विजेत्या दुर्गामाताला ” वंदे मातरम् ” चषक व रोख रु.वीस हजार ( ₹ २०,०००/-)देऊन गौरविण्यात आले. नाणेफेक हरलेल्या विजय क्लबला चषक व रोख रु.पंधरा हजार ( ₹ १५,०००/-) वर समाधान मानावे लागले. दुर्गामाताचा करण कदम ठरला या स्पर्धेतील सर्वोत्तम खेळाडू .त्याला आकर्षक चषक व किट बॅग देऊन गौरविण्यात आले.
या अगोदर झालेल्या उपांत्य फेरीच्या सामन्यात विजय क्लबने ५-५चढायांच्या जादा डावात विजय क्लबने गोलफादेवीचे कडवे आव्हान १९-१८ (६-५) असे परतवून लावत अंतिम फेरीत धडक दिली होती. मध्यांतराला गोलफादेवीकडे ८-५अशी आघाडी होती. तर पूर्ण डावात १३-१३अशी बरोबरी साधण्यात विजय क्लब यशस्वी ठरले आणि त्यानंतर ५-५चढायांच्या डावात विजयश्री खेचून आणली. शुभम वर्मा, रोशन थापा, सुनील पाटील विजय क्लबकडून, तर अनिकेत डावरे, अक्षय बिडू, साईल हरचकर यांचा खेळ उत्तम होता.
दुसऱ्या उपांत्य सामन्यात दुर्गामाताने प्रथमेश पालांडे, करण कदम यांच्या चतुरस्त्र खेळाच्या जोरावर जय भारत मंडळाचा २२-१७असा पाडाव करीत अंतिम फेरीत धडक दिली. स्पर्धेतील उत्कृष्ट चढाईचा खेळाडू म्हणून दुर्गामाताच्या प्रथमेश पालांडे, तर उत्कृष्ट पकडीचा खेळाडू म्हणून विजय क्लबच्या सुनील पाटीलची निवड करण्यात आली.
या स्पर्धेतील अंतिम सामन्यावर पावसाने पाणी फेरल्यामुळे कबड्डी रसिकांची मात्र घोर निराशा झाली. दुर्गामाताने मात्र या नाणेफेकीच्या कौलामुळे स्थानिक प्रथम श्रेणी पुरुष गटाच्या पहिल्या विजेतेपदाची नोंद केली. या स्पर्धेचे बक्षिस वितरण मुंबईच्या माजी महापौर सौ. श्रद्धा जाधव, विधान परिषद सदस्या विद्या चव्हाण, आहना फाऊंडेशनचे सचिव दिगंबर कांडरकर, ए सी पी राजेंद्र त्रिवेदी आदी मान्यवरांच्या उपस्थितीत पार पडला.