आता भारताचा ऑस्ट्रेलिया दौरा धोक्यात, होऊ शकतो वेळापत्रकात मोठा बदल

मुंबई । कोरोनानंतर भारतीय संघ यावर्षी ऑक्टोबरमध्ये ऑस्ट्रेलिया विरुद्ध पहिली आंतरराष्ट्रीय मालिका खेळणार आहे. या दौर्‍यावर दोन्ही देशांमध्ये 3 टी -20, 4 कसोटी आणि 3 वनडे सामने खेळले जाणार आहेत. परंतु ऑस्ट्रेलिया आणि आयपीएलमधील 14 दिवसांच्या क्वारंटाईन कालावधीमुळे दौर्‍याचे वेळापत्रक बदलू शकते. याचा परिणाम दोन्ही देशांमधील 11 ऑक्टोबरपासून सुरू होणार्‍या टी 20 मालिकेवर होऊ शकतो. हे सामने पुढील वर्षी दोन्ही देशांमधील एकदिवसीय मालिकेनंतर होऊ शकतात.

आयपीएलमुळे भारताच्या ऑस्ट्रेलिया दौर्‍याचे वेळापत्रकही बदलू शकते. बीसीसीआयने युएईमध्ये १९ सप्टेंबर ते ९ नोव्हेंबर २०२० दरम्यान आयपीएलची तयारी सुरू केली आहे. लीग नोव्हेंबरच्या दुसर्‍या आठवड्यात संपेल. यामध्ये दोन्ही देशांच्या बड्या खेळाडूंना सहभागी व्हावे लागेल. अशा परिस्थितीत ऑक्टोबरमध्ये भारत-ऑस्ट्रेलिया टी 20 मालिका घेणे कठीण आहे.

Indian Premier League (IPL) 2020 to be played from 19th September to 8th November. It will be a full-fledged tournament: Brijesh Patel, IPL Chairman pic.twitter.com/QsULr9EqtZ

— ANI (@ANI) July 24, 2020

सीएचे मुख्य कार्यकारी अधिकारी निक हॉकली यांनी हे स्पष्ट केले की, “ऑस्ट्रेलियामध्ये येणार्‍या प्रत्येक संघाला सरकारच्या सूचनेनंतर 14 दिवस क्वारंटाईनमध्ये रहावे लागेल. टीम इंडियालासुद्धा यातून सूट नाही. अशा परिस्थितीत ऑक्टोबरमध्ये दोन्ही देशांमध्ये टी 20 मालिका खेळविणे कठीण आहे.”

ते पुढे म्हणाले की, “कोरोना संसर्ग नियंत्रित करण्यासाठी कडक हेल्थ प्रोटोकॉल ऑस्ट्रेलियामध्ये लागू करण्यात आला आहे, हे समजण्यासारखे आहे. आमच्या सर्वांना कोरोनामुळे निर्माण होणार्‍या एका कठीण परिस्थितीचा सामना करावा लागला आहे आणि आम्ही इतर क्रिकेट बोर्डाला वेळापत्रकानुसार दिलेली आश्वासने सद्य परिस्थितीत पूर्ण करणे आव्हानात्मक असेल. अशा परिस्थितीत, दौर्‍याच्या तारखा आणि मालिकेतील सामन्यांची संख्या बदलू शकते.”

सध्याच्या वेळापत्रकानुसार भारतीय संघ ऑक्टोबरमध्ये ऑस्ट्रेलियाविरुद्ध 3 टी -20 मालिका खेळणार आहे. पहिला सामना 11, दुसरा 14 आणि तिसरा सामना 17 ऑक्टोबरला होणार होता. मात्र, आता पुढच्या वर्षी जानेवारीत वनडे मालिका संपल्यानंतर हे सामने होऊ शकतात.

भारत आणि ऑस्ट्रेलिया यांच्यात जानेवारीत 3 सामन्यांची वनडे मालिका खेळली जाणार आहे. पहिला सामना 12, दुसरा 15 आणि तिसरा सामना 17 जानेवारी रोजी खेळला जाणार आहे.

यानंतर दोन दिवसांचा ब्रेक ठेवल्यास 20 जानेवारीपासून टी 20 मालिका खेळता येईल आणि प्रत्येक दिवसाला सामना होत असेल तर 24 जानेवारीला दोन्ही देशांमधील शेवटचा टी -20 सामना होईल. अशा परिस्थितीत संघ 26 जानेवारीला भारतात परत येऊ शकेल.

बोर्डाच्या अधिकार्‍याच्या म्हणण्यानुसार, जानेवारीपर्यंत कोरोना नियंत्रणात येईल व खेळाडूंना अलग ठेवण्याची गरज भासली नाही. तरीही ऑस्ट्रेलिया दौर्‍यावरून परत आलेल्या खेळाडूंना 7 ते 10 दिवस विश्रांतीची आवश्यकता असेल. अशा परिस्थितीत इंग्लंड दौरा जानेवारीऐवजी फेब्रुवारीपासून सुरू होऊ शकतो. इंग्लंडला त्यांच्या भारत दौर्‍यावर 5 कसोटी मालिका खेळायच्या आहेत.