जवळपास ६ महिन्यांच्या प्रतिक्षेनंतर १९ सप्टेंबर (शनिवारी) रोजी चेन्नई सुपर किंग्स विरुद्ध मुंबई इंडियन्स संघातील सामन्याने इंडियन प्रीमियर लीगच्या तेराव्या हंगामाची सुरुवात झाली. त्यामुळे कोरोना व्हायरसच्या पार्श्वभूमीवर आयपीएल २०२०ची आस लावून बसलेल्या चाहत्यांचा आनंद गगनात मावेनासा झाला. सोबतच चेन्नई आणि मुंबई हे सर्वांचे आवडते संघ आमनेसामने आल्यामुळे चाहत्यांनी त्या क्षणाचा पुरेपुर आनंद लुटला.
मलेशियन आधारित डिजिटल मीडिया कंपनी लेट्सओटीटीनुसार शनिवारी आयपीएलचा हा पहिला सामना पाहण्याकरिता स्टार ब्रॉडकास्टर स्टार इंडियाचा व्हिडिओ स्ट्रीमिंग प्लॅटफॉर्म डिज्नी प्लस आणि हॉटस्टारवर तब्बल ८.१ मिलियन म्हणजेच ८१ लाख लोकांनी लॉग इन केले होते. विशेष म्हणजे हे पेड सबस्क्राईबर होते. यासह एका नव्या जागतिक विक्रमाची नोंद झाली आहे. CSK Vs MI Match Set A New Record Of Viewers
बीसीसीआयचे सचिव जय शहा यांनीही आज त्यांच्या अधिकृत ट्विटर अकाउंटवरुन टीव्हीच्या माध्यमातून आयपीएलचा पहिला सामना पाहिलेल्या प्रेक्षकांची माहिती दिली. त्यांनी लिहिले की, “आयपीएलच्या पहिल्या सामन्याने एक नवा विक्रम नोंदवला आहे. बीएआरसीनुसार, २० कोटी लोकांनी हा सामना टीव्हीच्या माध्यमातून पाहिला आहे. जगभरातील कोणत्याही क्रिकेट लीगला आजवर एवढा मोठा दर्शक वर्ग लाभला नाही.”
या सामन्यात एमएस धोनीच्या नेतृत्त्वाखालील चेन्नई संघाने ५ विकेट्सने दणदणीत विजय मिळवला. यासह धोनीने आयपीएल कारकिर्दीतील सीएसकेकडून कर्णधार म्हणून तब्बल १००वा सामने जिंकला आहे.
