नारायणगाव । जुन्नर कबड्डी लीग आयोजित सरपंच चषकाच्या कालच्या दुसऱ्या दिवशी धक्कादायक आणि अनपेक्षित निकाल पाहायला मिळाले. काल झालेल्या कॉलबॅक राऊंड्सच्या सामन्यांमध्ये पहिल्या सामन्यात स्वराज्य वॉरियर्स संघाने पहिल्या दिवशीची कसर भरून काढली.
पहिल्या दिवशी ० गुण असलेल्या आणि एकही सामना न जिंकलेल्या स्वराज्य वॉरियर्सने काल मात्र मैदानात अक्षरशः धुडगूस घातला. प्रथमेश निघोटच्या जबरदस्त पकडी, गोकुळ तोडकरीच्या दमदार चढायांमुळे या संघाने राजे शिवछत्रपती प्रतिष्ठानचा १८ गुणांनी (३० – १२) पराभव करत सुपरसिक्समध्ये प्रवेश केला.
कॉलबॅकच्या दुसऱ्या सामन्यात श्री गणेश फायटर्सने पहिल्या दिवशीची लय कायम राखत शिवस्वराज्य चॅलेंजर्स या संघाचा (१८ – २० ) असा पराभव करत सुपर सिक्स मध्ये प्रवेश केला.
सुपर सिक्स राऊंड्सच्या पहिल्या सामन्यात अतुलदादा बेनके स्पोर्ट्स क्लबला सचिन स्पोर्ट्सकडून (१८- ३३) अशा धक्कादायक पराभवाला सामोरे जावे लागले.
कर्णधार मयुर तांबोळीच्या खेळाला अटकाव घालत सचिन स्पोर्ट्सने या सामन्यात जबरदस्त खेळाचे प्रदर्शन केले. सचिन स्पोर्ट्सकडून सागर काळे आणि अनिकेत रोडे यांनी आपल्या लौकिकाला साजेसा खेळ करत या सामन्यात आपले वर्चस्व सिद्ध केले.
त्यानंतर ओमसाई टायगर्स वि. गणपीर चॅम्पियन्स या सामन्यात प्रवीण मुळुखच्या अफलातून चढायांपुढे ओमसाई टायगर्सला आपले आव्हान राखता आले नाही. अभिजित जेडगुले आणि सोमनाथ पानसरेने प्रवीण ला घेरत केलेला सुपर टॅकल प्रेक्षकांची मने जिंकून गेला.
गणपीर चॅम्पियन्सने २१ वि. १४ गुणांनी हा सामना जिंकला.
सुपर सिक्स च्या इतर सामनांमध्ये श्री गणेश फायटर्सने ओमसाई टायगर्सचा (१५ – २१) ने पराभव करत आपले आव्हान कायम राखले. तर दुसरीकडे स्वराज्य वॉरियर्सने अतुलदादा बेनके स्पोर्ट्स क्लब या मातब्बर संघाला (१५ – २५) धूळ चारत स्पर्धेत आपण अजूनही दावेदार आहोत हे दाखवून दिले.
गणपीर चॅम्पियन्सने श्री गणेश फायटर्स चा (२१ – १४) असा पराभव केला. सुपर सिक्स च्या शेवटच्या सामन्यात स्वराज्य वॉरियर्सने अनपेक्षित निकालांचा धडाका चालू ठेवत अगदी शेवटच्या क्षणी १५ – १४ असा खेळ चालू असताना स्वराज्य वॉरियर्स कडून डू ऑर डाय रेड चालू असताना सचिन स्पोर्ट्सच्या अनिकेत तांबोळीने सुपर टॅकल करण्याचा प्रयत्न अयशस्वी ठरला आणि स्वराज्य वॉरियर्स सलग तिसरा विजय नोंदवला.
जुन्नर कबड्डी लीगच्या काल दुसऱ्या दिवशीही प्रेक्षकांची उपस्थिती उल्लेखनीय होती. आज या सामान्यांचा शेवटचा दिवस असून जुन्नर कबड्डी लीगच्या पहिल्या पर्वाचा विजेता कोण होणार कोण जिंकणार सरपंच चषक हे चित्र आज स्पष्ट होईल.
सुपर सिक्स नंतर गुण तालिका-
स्वराज्य वॉरियर्स – ४ गुण
गणपीरबाबा चॅम्पियन्स – ४ गुण
सचिन स्पोर्ट्स- २ गुण
श्री गणेश फायटर्स – २ गुण
महत्त्वाच्या बातम्या –
–१० कोटी आणि १९ दिवस खर्च करुन बनवले होते फेडरर-नदालसाठी हे खास कोर्ट
–आता गुरू जस्टिन लॅंगर दाखवणार आॅस्ट्रेलियाला मार्ग, प्रशिक्षकपदी नियुक्त
–दिल्ली डेअरडेविल्सच्या तीन पोरांनी राजस्थान राॅयल्सला रडवले
–हा दिग्गज म्हणतोय मुंबई पुढील सहाही सामने जिंकणारच!
–राॅजर फेडररची का होतेय आज मोठी चर्चा?