टी-20 वर्ल्ड कप 2026 च्या फायनलमध्ये भारताकडून पराभूत झाल्यानंतर, न्यूझीलंडचा संघ आता मायदेशात दक्षिण आफ्रिकेचा सामना करत आहे. मात्र, या मालिकेची सुरुवात किवी संघासाठी अत्यंत निराशाजनक झाली आहे. पहिल्याच सामन्यात दक्षिण आफ्रिकेने न्यूझीलंडवर मोठा विजय मिळवत 5 सामन्यांच्या मालिकेत 1-0 अशी आघाडी घेतली आहे. आता 17 मार्च रोजी हॅमिल्टन येथे दुसरा सामना होणार आहे, परंतु त्यापूर्वीच न्यूझीलंडचे दोन महत्त्वाचे खेळाडू संघातून बाहेर झाले आहेत.
न्यूझीलंडचा अनुभवी लेग स्पिनर ईश सोढ़ी सराव दरम्यान अंगठ्याला दुखापत झाल्यामुळे संपूर्ण मालिकेतून बाहेर झाला आहे. स्कॅनिंगमध्ये त्याच्या अंगठ्याला फ्रॅक्चर असल्याचे समोर आले असून, त्याला किमान चार आठवडे विश्रांती घ्यावी लागणार आहे.
फलंदाज बेवोन जॅकोब्स पहिल्या टी-20 सामन्यात क्षेत्ररक्षण करताना गुडघ्यावर पडला होता. त्यामुळे त्याला मैदान सोडावे लागले. त्याच्या गुडघ्याला गंभीर दुखापत झाली असून तो कधी परतणार हे अद्याप स्पष्ट नाही. त्याच्या जागी कटेन क्लार्क याचा संघात समावेश करण्यात आला आहे.
पहिल्या टी-20 सामन्यात दक्षिण आफ्रिकेने न्यूझीलंडचा 7 विकेट्स राखून पराभव केला होता. या सामन्यात न्यूझीलंडची फलंदाजी पूर्णपणे कोलमडली आणि संपूर्ण संघ अवघ्या 91 धावांवर गारद झाला होता. आता दुसऱ्या सामन्यात विजय मिळवून मालिकेत पुनरागमन करण्याचे मोठे आव्हान न्यूझीलंडसमोर असेल.
