टी-20 वर्ल्ड कप 2026 मध्ये आपले आव्हान टिकवून ठेवण्यासाठी इंग्लंडला स्कॉटलंडविरुद्धचा सामना कोणत्याही परिस्थितीत जिंकणे आवश्यक आहे. वेस्ट इंडिजविरुद्ध फलंदाजांच्या खराब कामगिरीमुळे इंग्लंडला पराभव स्वीकारावा लागला होता, तर नेपाळविरुद्धचा सामना त्यांनी कसाबसा जिंकला होता. आता कर्णधार हॅरी ब्रूकला (Harry Brook) आपल्या फलंदाजांकडून चांगल्या कामगिरीची अपेक्षा असेल.
स्कॉटलंडविरुद्धच्या महत्त्वाच्या सामन्यासाठी इंग्लंडने आपल्या संघात कोणताही बदल न करण्याचा निर्णय घेतला आहे. वेस्ट इंडिजविरुद्ध जो संघ मैदानात उतरला होता, त्याच 11 खेळाडूंवर हॅरी ब्रूकने पुन्हा एकदा विश्वास दाखवला आहे. वेस्ट इंडिजविरुद्ध 197 धावांच्या लक्ष्याचा पाठलाग करताना इंग्लंडचा संघ अवघ्या 166 धावांत गारद झाला होता.
कर्णधार ब्रूकला अद्याप या स्पर्धेत मोठी खेळी करता आलेली नाही, तर बटलर (Jos Buttler) चांगल्या सुरुवातीचे मोठ्या धावसंख्येत रूपांतर करण्यात अपयशी ठरत आहे. इंग्लंडची गोलंदाजीही कमकुवत दिसत आहे. जोफ्रा आर्चरने विंडीजविरुद्ध 4 ओव्हरमध्ये 48 धावा दिल्या, तर सॅम करनने 3 ओव्हरमध्ये 36 धावा केल्या.
वेस्ट इंडिजविरुद्धच्या पराभवामुळे इंग्लंडचा पुढचा प्रवास खडतर झाला आहे. इंग्लंडला आता उरलेले दोन्ही सामने मोठ्या फरकाने जिंकावे लागतील. जर स्कॉटलंडने इंग्लंडला हरवले, तर इंग्लंडला इतर संघांच्या निकालांवर अवलंबून राहावे लागेल. सध्या इंग्लंडचा संघ गुणतालिकेत नेपाळच्या वर चौथ्या क्रमांकावर आहे.
