जे १३ वर्षात यष्टीरक्षक एमएस धोनीलाही नाही जमले ‘ते’ संजू सॅमसनने करुन दाखवले

आयपीएलच्या तेराव्या हंगामातील चौथा सामना मंगळवारी चेन्नई सुपर किंग्ज विरुद्ध राजस्थान रॉयल्स संघात झाला. या सामन्यात नाणेफेक जिंकत एमएस धोनीने प्रथम क्षेत्ररक्षणाचा निर्णय घेतला. परंतू राजस्थानच्या संजू सॅमसन, स्टिव स्मिथ व जोफ्रा आर्चरने हा निर्णय अयोग्य ठरवत चेन्नईची चांगलीच धुलाई केली.

राजस्थानने निर्धारित २० षटकांत ७ बाद २१६ धावा करताना चेन्नईच्या जवळपास सर्वच गोलंदाजांना रडकुंडीला आणले. संजू सॅमसनने ३२ चेंडूत ७४ धावा केल्या. यात त्याच्या एका चौकाराचा आणि ९ षटकारांचा समावेश होता. तर स्टिव स्मिथने ४७ चेंडूत ६९ आणि जोफ्रा आर्चरने ८ चेंडूत २७ धावा ठोकल्या.

त्यानंतर राजस्थानच्या २१७ धावांच्या डोंगराएवढ्या आव्हानाचा पाठलाग करताना चेन्नई संघ ६ विकेट्स गमावत केवळ २०० धावा करु शकला आणि राजस्थानने १६ धावांनी सामना खिशात घातला. दरम्यान राजस्थानच्या सॅमसनने यष्टीमागेही दमदार कामगिरी करत एक अनोखा विक्रम आपला नावावर केला. first time in 760 IPL matches that a keeper took two stumpings off two consecutive balls.

झाले असे की, राजस्थानचा फिरकीपटू राहुल तेवतिया डावातील ९वे षटक टाकण्यासाठी आला. त्याच्या दूसऱ्या आणि तिसऱ्या चेंडूवर चेन्नईचा फलंदाज सॅम करनने एकापाठोपाठ एक २ दमदार षटकार मारले. पण राहुलने षटकातील पाचवा चेंडू टाकला, जो थोडा बाहेरच्या बाजूने गेला आणि यष्टीमागे असणाऱ्या सॅमसनने तो चेंडू पकडत करनला यष्टीचीत केले. एवढेच नाही तर, पुढील चेंडूवरही नुकताच फलंदाजीला आलेल्या ऋतुराज गायकवाडलाही त्याने यष्टीचीत करत तंबूचा रस्ता दाखवला.

यासह सॅमसन हा आयपीएलमधील आतापर्यंतच्या ७६० सामन्यांच्या इतिहासात सलग २ चेंडूंवर २ फलंदाजांना यष्टीचीत करणारा पहिलाच यष्टीरक्षक ठरला आहे. त्याच्याव्यरिक्त आजवर कोणत्याही यष्टीरक्षकाला हा कारनामा करता आला नाही.