शेन वॉट्सनबरोबर झालेल्या ‘त्या’ वादाबद्दल १२ वर्षांनंतर गौतम गंभीरने केला मोठा खूलासा

भारताचा माजी सलामीवीर फलंदाज गौतम गंभीर मैदानावर नेहमी एक आक्रमक स्वभावाचा खेळाडू म्हणून ओळखला गेला. त्याचे अनेक प्रतिस्पर्धी क्रिकेटपटूंबरोबर मैदानात वाद झाले आहेत. यात शाहिद आफ्रिदी, कामरान अकमल, शेन वॉट्सन अशा काही क्रिकेटपटूंची नावे आहेत.

शेन वॉट्सनबरोबर त्याची 2008 ला भारत विरुद्ध ऑस्ट्रेलिया संघात झालेल्या दिल्ली कसोटी दरम्यान बाचाबाची झाली होती.

या दरम्यान गंभीर आणि त्यावेळी गोलंदाजी करणार्‍या शेन वॉटसनमध्ये वाद झाले आणि गंभीरने एकेरी धाव घेत असताना वॉट्सनला कोपरात धडक दिली असल्याचे दिसून आले होते. त्यावेळी गंभीरवर एका सामन्याच्या बंदीची कारवाई सामनाधिकारी ख्रिस ब्रॉड यांनी केली होती.

या घटनेबद्दल आता गंभीरने खूलासा केला असून त्याने म्हटले आहे की त्याने वॉट्सनला जाणूनबुजून कोपरा मारला नव्हता. स्टार स्पोर्ट्सच्या क्रिकेट कनेक्टेड शोमध्ये बोलताना त्याने सांगितले की ‘शेन वॉट्सन! मी हे सर्व जाणूनबुजून केले नव्हते. पण माझ्यावर एका सामन्याची बंदी लागली. अनेकजण म्हणतात मी त्याला कोपरा मुद्दाम मारला. पण मी कोणत्याही हेतूने हे केले नव्हते.’

गंभीर पुढे म्हणाला, ‘जेव्हा मी या खटल्याच्या सुनावणीसाठी जात होतो तेव्हा, गॅरी कर्स्टन यांनी मला चूक स्वीकारण्यास सांगितले कारण ते ख्रिस ब्रॉड होते. त्यामुळे ते मला अतिरिक्त सहानुभूती देतील आणि बंदी घालणार नाही. जेव्हा मी गॅरीबरोबर आत गेलो, तेव्हा ख्रिस यांनी मला विचारले की मी माझी चूक मान्य करत आहे का, म्हणून मी हो म्हणालो, मग त्यांनी मला सांगितले की तुझ्यावर बंदींची कारवाई होत आहे.’

या सामन्यात गंभीरने शानदार फलंदाजी केली होती. त्याने पहिल्या डावात शानदार द्विशतक केले होते. त्याने 206 धावा केल्या होत्या. तसेच व्हीव्हीएस लक्ष्मणनेही द्विशतक करताना नाबाद 200 धावा केल्या होत्या. त्यामुळे भारताने पहिला डाव 613 धावांवर घोषित केला होता.

त्यानंतर ऑस्ट्रेलियाकडून मायकल क्लार्कने पहिल्या डावात 112 धावांची शानदार शतकी खेळी केली होती. तर मायकल हसी, रिकी पाँटिंग, सायमन कॅटिच, मॅथ्यू वेड यांनी अर्धशतके केली होती. त्यामुळे ऑस्ट्रेलियाने 577 धावा या डावात केल्या.

दुसऱ्या डावात भारताने 208 धावांवर डाव घोषित करत पहिल्या डावातील 36 धावांच्या आघाडीसह ऑस्ट्रेलियाला 245 धावांचे आव्हान दिले. या आव्हानाचा पाठलाग करताना ऑस्ट्रेलिया बिनबाद 31 धावांवर असताना सामन्याचा पाचवा दिवस संपल्याने सामना अनिर्णित राहिला.

ट्रेंडिंग घडामोडी – 

भारतीय सैनिकांबद्दलचे वादग्रस्त ट्वीट चेन्नई सुपर किंग्जच्या डॉक्टराला पडले महागात; केले सस्पेंड…

आता विराट-सचिनच्या नावाने मेलबर्नमध्ये असणार घराचा पत्ता

क्रिकेट ऑस्ट्रेलियाला संकटातून बाहेर काढणाऱ्या दिग्गजानेच दबावामुळे दिला राजीनामा…