ऑस्ट्रेलिया विरुद्ध इंग्लंड यांच्यातील ३ वनडे सामन्यांची मालिका गुरुवारी ऑस्ट्रेलियाने ३ गडी राखत जिंकली. या विजयात ग्लेन मॅक्सवेलच्या ९० चेंडूत १०८ धावा व ऍलेक्स कॅरेच्या ११४ चेंडूत १०६ धावा या सामन्यातील विशेष ठरल्या. यात ऍलेक्स कॅरे सहाव्या तर ग्लेन मॅक्सेवल सातव्या स्थानावर फलंदाजीला आला होता.
या सामन्यात ३१ वर्षीय ग्लेन मॅक्सवेलने एक खास पराक्रम केला. त्याने वनडे कारकिर्दीत ३ हजार धावांचा टप्पा पार केला. ११३ वनडे सामन्यांत १०३ डावांत फलंदाजी करताना त्याने ३३.२९च्या सरासरीने ३०६३ धावा केल्या.
९० चेंडूत १०६ धावा करताना मॅक्सवेलने ४ चौकार व ७ षटकार मारले. शिवाय ७व्या क्रमांकावर फलंदाजीला येत संघ संकटात असताना त्याने हा कारनामा केला. यामुळे त्याच्या खेळीचे जगभरातून कौतूक होत आहे.
हाच मॅक्सवेल आयपीएल २०२०साठी सज्ज झाला आहे. तो किंग्ज ११ पंजाब संघाकडून खेळणार आहे. या संघाचे त्याने एकेवेळी कर्णधारपदही भुषविले आहे. तसेच यावेळी तो भारतीय प्रतिभावान क्रिकेटर केएल राहुच्या नेतृत्त्वाखाली खेळताना दिसेल. ऑस्ट्रेलिया व इंग्लंडचे खेळाडू शुक्रवारी इंग्लंडवरुन दुबईला रवाना होणार आहे. येथे त्यांना २३ तारखेपर्यंत क्वारंटाईन व्हावे लागणार आहे. त्यानंतर मात्र मॅक्सवेल आयपीएलमध्ये धमाका करण्यासाठी सज्ज असेल.
मॅक्सवेलने आयपीएलमध्ये ६९ सामन्यात २२.९च्या सरासरीने १३९७ धावा केल्या आहेत. त्याचा स्ट्राईक रेट हा १६१.१३चा जबरदस्त आहे. अतिशय स्फोटक फलंदाज म्हणून त्याकडे पाहिले जाते. विशेष म्हणजे संघासाठी तो उपयुक्त गोलंदाजीही करतो. गेले काही महिने हा खेळाडू क्रिकेटपासून दूर होता. परंतू आता त्याने कमबॅक जबरदस्त केले आहे. यामुळे यावेळी इतर संघांना त्याचे एक वेगळेच टेन्शन असणार आहे.
