आशियाई क्रीडा स्पर्धा 2023 स्पर्धेत क्रिकेट या खेळात नेपाळ क्रिकेट संघाने इतिहास रचला आहे. खेळाच्या पहिल्याच सामन्यात नेपाळ विरुद्ध मंगोलिया संघ आमने-सामने होते. या सामन्यात नेपाळचा 273 धावांनी विजय झाला. या विजयासह नेपाळने टी20 क्रिकेटच्या इतिहासातील सर्वच विक्रम मोडीत काढले. नेपाळ टी20 क्रिकेटमध्ये सर्वाधिक 314 धावसंख्या उभारणारा संघ बनला. तसेच, संघाच्या दोन फलंदाजांनी वेगवान शतक आणि अर्धशतकांचा विक्रमही मोडीत काढला. विशेष म्हणजे, या सामन्यातील जबरदस्त कामगिरीसाठी कुशल मल्ला याला सामनावीर पुरस्काराने गौरवण्यात आले.
टी20 इतिहासातील सर्वाधिक धावसंख्या आणि सर्वात मोठा विजय
या सामन्यात मंगोलिया संघाने नाणेफेक जिंकत गोलंदाजीचा निर्णय घेतला होता. हा निर्णय नेपाळच्या फलंदाजांनी सपशेल चुकीचा ठरवला. यावेळी नेपाळने निर्धारित 20 षटकात 3 विकेट्स गमावत तब्बल 314 धावांचा भलामोठा डोंगर उभारला होता. हा डोंगर मंगोलियाच्या फलंदाजांना सर करता आलाच नाही. मंगोलिया संघाचा डाव 13.1 षटकात अवघ्या 31 धावांवर संपुष्टात आला. यामुळे नेपाळने हा सामना 273 धावांनी जिंकला. यासह नेपाळ संघ आंतरराष्ट्रीय टी20 क्रिकेटमध्ये सर्वाधिक धावसंख्या (314) आणि सर्वात मोठा विजय (273) मिळवणारा संघ बनला.
🏆 Match Day 01 🇳🇵🇲🇳 🏏
One match destined for the history books. 🔥 A historic showdown in Match 01 of the Asian Games by the Rhinos, with a record-breaking first innings, and immense gratitude to our devoted supporters. 🏏🇳🇵🔥#weCAN #AsianGames pic.twitter.com/dDCPu4s3pe— CAN (@CricketNep) September 27, 2023
मंगोलियाचा डाव पत्त्यांच्या बंगल्याप्रमाणे कोसळला
नेपाळच्या 315 धावांच्या आव्हानाचा पाठलाग करताना मंगोलियाचा एकही फलंदाज टिच्चून फलंदाजी करू शकला नाही. दहाच्या दहा फलंदाज झटक्यात बाद झाले. फक्त दावासुरेन जम्यान्सुरेन यालाच फक्त 10 धावा करता आल्या. इतर एकही फलंदाज 5 धावांचाही आकडा पार करू शकला नाही. यावेळी नेपाळकडून गोलंदाजी करताना तीन गोलंदाजांनी प्रत्येकी 2, तर 3 गोलंदाजांनी प्रत्येकी 1 विकेट नावावर केली.
कुशलसह कर्णधार रोहित आणि दिपेंद्रचा झंझावात
तत्पूर्वी प्रथम फलंदाजी करताना नेपाळकडून कुशल मल्ला (Kushal Malla) चमकला. त्याने या सामन्यात 50 चेंडूंचा सामना करताना सर्वाधिक 137 धावा चोपल्या. त्याच्या खेळीत 8 चौकार आणि 12 षटकारांचा समावेश होता. यावेळी त्याने अवघ्या 34 चेंडूत विक्रमी शतक साजरे केले. त्याच्याव्यतिरिक्त कर्णधार रोहित पौडेल (Rohit Paudel) याने 27 चेंडूत 61 धावांची अर्धशतकी खेळी केली. तसेच, दिपेंद्र सिंग (Dipendra Singh) यानेही अवघ्या 10 चेंडूत 52 धावांची विस्फोटक अर्धशतकी खेळी साकारली. त्याने 9 चेंडूत अर्धशतक करत युवराज सिंग (Yuvraj Singh) याचा 12 चेंडूत अर्धशतकाचा विक्रमही मोडला. नेपाळचे सलामीवीर कुशल भुर्टेल (19) आणि आसिफ शेख (16) लवकर बाद झाले, पण त्यामुळे संघाला फारसे नुकसान झाले नाही.
मंगोलियाकडून गोलंदाजी करताना कर्णधार लुव्हसानझुंडुई एर्डेनेबुल्गन (Luvsanzundui Erdenebulgan), दावासुरेन जम्यान्सुरेन आणि मुंगून अल्तांखुयाग यांनी प्रत्येकी 1 विकेट नावावर केली. (Historic win for the Nepal cricket team as they beat Mongolia by 273 runs Asian games 2023)
हेही वाचा-
भीमपराक्रम! युवराजचा वेगवान अर्धशतकाचा रेकॉर्ड 16 वर्षांनी उद्ध्वस्त, नेपाळच्या पठ्ठ्याने केली डेरिंग; वाचाच
बाबो…नेपाळचा कहर! 20 षटकात 300पेक्षा जास्त धावा चोपत घडवला इतिहास, रोहितचा वेगवान शतकाचा रेकॉर्डही तुटला