बीसीसीआयने (BCCI) सोमवारी प्रज्ञान ओझा (Pradnyaan Ojha) यांची पुरुष निवड समितीच्या नव्या अध्यक्षपदी नियुक्ती केल्याचं अधिकृतपणे जाहीर केलं आहे. माजी क्रिकेटपटू आणि भारतीय महिला संघाचे माजी मुख्य प्रशिक्षक रमेश पोवार (Ramesh Powar) यांचाही निवड समितीत समावेश करण्यात आला आहे.
अजित आगरकर (Ajit Agarkar) यांनी पद सोडल्यानंतर प्रज्ञान ओझा अंतरिम मुख्य निवडकर्ता म्हणून काम पाहत होते. न्यूझीलंड दौऱ्यासाठी भारतीय संघाची निवडही त्यांनीच केली होती. दरम्यान, भुवनेश्वर कुमारचं (Bhuvneshwar Kumar) चार वर्षांनंतर भारतीय संघात पुनरागमन झालं आहे. त्याची आंतरराष्ट्रीय कारकीर्द संपल्याचं मानलं जात होतं.
निवड समितीतील पाचही सदस्यांमध्ये प्रज्ञान ओझा यांनी भारताकडून सर्वाधिक कसोटी सामने खेळले आहेत. याच निकषांच्या आधारे त्यांची मुख्य निवडकर्ता म्हणून नियुक्ती करण्यात आली आहे. 40 वर्षीय ओझा यांनी 2009 ते 2013 या काळात भारताकडून 24 कसोटी सामने खेळले. यामध्ये त्यांनी 113 विकेट्स घेतल्या आहेत. तसेच, ओझा 2015 पर्यंत आयपीएलमध्ये खेळत होते. त्यानंतर ते समालोचनाच्या क्षेत्रात कार्यरत होते.
बीसीसीआयने प्रज्ञान ओझा यांची मुख्य निवडकर्ता म्हणून नियुक्ती करतानाच रमेश पोवार यांचाही निवड समितीत समावेश केला आहे.
बीसीसीआयने दिलेल्या माहितीनुसार, पुरुष निवड समितीतील एका सदस्याच्या नियुक्तीसाठी क्रिकेट सल्लागार समितीने (CAC) निवड प्रक्रिया पूर्ण केली. या समितीने बीसीसीआयच्या मुख्यालयात अर्जदारांची छाननी केली आणि त्यांच्या मुलाखती घेतल्या. या प्रक्रियेनंतर समितीने एकमताने रमेश पोवार यांच्या नियुक्तीची शिफारस केली.
प्रज्ञान ओझा यांना वरिष्ठ पुरुष निवड समितीचे मुख्य निवडकर्ता म्हणून वर्षाला 3 कोटी रुपये वेतन मिळणार आहे. म्हणजेच त्यांना दरमहा सुमारे 25 लाख रुपये मिळतील. याआधी अजित आगरकर यांनाही इतकंच वेतन मिळत होतं.
कसोटी क्रिकेटशिवाय प्रज्ञान ओझा यांनी भारताकडून 18 वनडे सामने आणि 6 टी-20 आंतरराष्ट्रीय सामने खेळले आहेत. त्यांनी वनडे क्रिकेटमध्ये 21, तर टी-20 आंतरराष्ट्रीय क्रिकेटमध्ये 10 विकेट्स घेतल्या.
आयपीएलमध्ये ते दोन संघांकडून खेळले आहेत. आयपीएलच्या पहिल्या हंगामापासून ते 2011 पर्यंत डेक्कन चार्जर्स संघाचा भाग होते. त्यानंतर 2012 मध्ये ते मुंबई इंडियन्स संघात दाखल झाले. 2015 मधील त्यांच्या शेवटच्या आयपीएल हंगामापर्यंत ते याच संघाकडून खेळले.
